Bıznesmender otandyq oıynshyqtardy shyǵara alady
«Búginde biz polıetılen zaýyty jobasy boıynsha aldyn-ala tehnıkalyq-ekonomıkalyq negizdemeni aıaqtaǵanymyzdy habarlaımyz. Osy negizdemege sáıkes, atalǵan zaýyt jylyna 1 mıllıon 250 myń tonna polıetılen shyǵaratyn bolady. Jobanyń naqtyly somasy tehnıkalyq ekonomıkalyq negizdeme men smetalyq qujat daıyn bolǵan soń aıqyndalady. Kepildi gaz shıkizaty Teńizshevroıldan alynady. Osy jyldyń sońyna deıin tehnıkalyq ekonomıkalyq negizdemeni aıaqtaýdy josparlap otyrmyz. Ol úshin Birikken hımııalyq kompanııa men Borealis arasynda birlesken jobalyq kompanııa qurylyp jatyr», - dedi M.Myrzaǵalıev Úkimet úıinde ótken baspasóz máslıxatynda.
Vıtse-mınıstrdiń aıtýynsha, Borealis kompanııasy polıpropılen zaýytynyń qurylysyna da qatysady. Osyǵan oraı, arnaıy memorandýmǵa qol qoıyldy. Atalǵan qujat aıasynda Borealis polıpropılen zaýyty jobasynyń tehnıkalyq jáne ekonomıkalyq taldaýyn júrgizetin bolady.
«Biz osy joba boıynsha Borealis-pen birge tabysty jumys atqaramyz dep úmittenip otyrmyz. Bul jobanyń quny 2,6 mlrd. AQSh dollary, al qýaty jylyna 500 000 tonna polıpropılen bolady. Qazirde jobany Birikken hımııalyq kompanııa júzege asyryp jatyr. Jobanyń bas merdigeri de anyqtalyp otyr. Qarjylandyrý kózderi de tartyldy. Bıyl qurylys jumystary bastalady jáne 2021-2022 jyly aıaqtalady», - dep atap kórsetti M.Myrzaǵalıev.
Aıta keteıik, 2030 jylǵa qaraı munaıgaz-hımııalyq ónimderdi tutyný eki ese, ıaǵnı qazirgi 1 trıllıonnan 1,8 trıllıon AQSh dollaryna deıin ósedi degen boljam bar. Jalpy, álem boıynsha polıpropılen men polıetılen qansha óndirilse de, suranysty tolyǵymen óteý qıyn. Qazirdiń ózinde álemdik óndiris suranystyń tek 60 protsentin ǵana ótep otyr.
«Demek, qansha shyǵarsa da, atalǵan shıkizatqa degen suranys tómendemeıdi. Óıtkeni bul ónimderge suranys zor qarqynmen ósip keledi. Osy atalǵan bazalyq hımııa óndiristerin iske qosqannan keıin olardyń aınalasynda, turmysymyzda, ónerkásipte de kúndelikti tutyný ónimderin shyǵaratyn shaǵyn jáne orta kásiporyndar qalyptasatyn bolady. Olar plastıkalyq ydystar, oıynshyqtar, matalar jáne kúndelikti qoldanylatyn tehnıka, plastıkalyq tereze, qubyrlar jáne sol sııaqty kóptegen ónimder bar», - deıdi vıtse-mınıstr M.Myrzaǵalıev.
