Bıznesmender Almaty haıýanattar baǵyn qaıta jańǵyrtpaq
ALMATY. 24 shilde. QazAqparat - Qalalyq mádenıet basqarmasy Almaty haıýanattar baǵy janyndaǵy Qoǵamdyq keńestiń quramyn maquldady.
Oǵan - Raıymbek Batalov, Serik Ahanov, Asqar Baıtasov, Elena Kýkele, Qýanysh Daýtov, Sergeı Sklıarenko men Ramıl Mýhorıapov enip otyr. Keńestiń basty maqsaty - Almaty haıýanattar baǵyn kúlli qazaqstandyqtardyń súıikti demalys ornyna aınaldyrý.
«Bul Qoǵamdyq keńestiń qurylýy - qazaqstandyqtardyń mádenı ómirin damytýdyń jańa kezeńi bolmaq. Biz haıýanattar baǵynyń jumysyn jaqsartýǵa kómektesý úshin óz salalarymyzdaǵy úzdik mamandardy shaqyrdyq. Qazirgi tańda qalalyq jobanyń kóptegen ólshemderge saı kelmeıtinin túsine otyryp, biz Almaty haıýanattar baǵynyń barlyq demalýshylar úshin kórikti, tartymdy, taza orynǵa aınalǵanyn qalaımyz. Qala qonaqtary tek Medeý men Shymbulaqqa ǵana baryp qoımaı, haıýanattar baǵyna da kelýi úshin», - deıdi Mádenıet basqarmasynyń bastyǵy Qaırat Qulbaev. Qazirgi tańda Almaty haıýanattar baǵyn jyl saıyn 500 myń adam tamashalaýda. Qoǵamdyq keńes onyń damýy, kelýshiler sanynyń ulǵaıýy úshin donorlyq jáne demeýshilik qarjy tartý quqyn ıelenip otyr.
Almaty haıýanattar baǵynyń dırektory Áýezhan Ábdirahımovtyń aıtýynsha, ol 80 jyldyń ishinde 200-ge jýyq janýarlary bar baqtan álemdegi iri haıýanattar baǵynyń birine aınaldy. 21 gektarǵa jýyq aýmaqty alyp jatqan Almaty haıýanattar baǵynda búgingi tańda 152 torda ańdardyń 341 túri ósip-ónýde. Onyń 31-i - Qyzyl kitapqa kirgender.
