Bıznesmen Krıýchkovtyń isine qatysty úkim ózgerdi
QARAǴANDY. QazAqparat - Qaraǵandy oblystyq soty bıznesmen Vladımır Krıýchkovke qatysty Kókpektilik is boıynsha úkimdi ózgertti. Kásipkerge qurylys jumystaryn júrgizý erejelerin buzdy jáne qyzmettik laýazymyn asyra paıdalandy degen aıyp taǵyldy.
«Buqar Jyraý aýdandyq sotynyń Smaılov, Jantólıkovke qatysty úkimi ózgerissiz qalsyn. QR QK 245-baby, 2-bólimi boıynsha Krıýchkovke qatysty osy úkimniń is qaǵazdaryn júrgizý toqtatylsyn. QR QK 228-baby boıynsha Krıýchkovtyń bostandyǵy eki jylǵa shektelsin», - degen apellıatsııalyq qaýlyny Qaraǵandy oblystyq sotynyń sýdıasy Rashıd Nurmaǵambetov oqydy.
Krıýchkovke qatysty probatsııalyq baqylaý sharasy qabyldandy. Sot prokýror men japa shegýshilerdiń shaǵymyn qanaǵattandyrmady.
Bıznesmen bolsa tolyq aqtalýǵa talpynatynyn jetkizdi.
Eske sala keteıik Buqar Jyraý aýdandyq sotynda Kókpekti isi boıynsha úkim 2016 jyly 20 maýsymda shyqqan. «Tabıǵat XXI» JShS negizin qalaýshy, bıznesmen Vladımır Krıýchkovty qurylys jumystaryn júrgizý kezinde qaýipsizdik sharalaryn saqtamady jáne qyzmettik laýazymyn asyra paıdalandy dep aıyptap, jalpy tártiptegi túrmege 3 jylǵa qamaý jazasy taǵaıyndalǵan bolatyn.
