«Bızneske jol» jobasy aıasynda bıznestiń 400-den astam máselesi sheshildi

ASTANA. QazAqparat - Sońǵy jarty jylda Sybaılas jemqorlyqqa qarsy qyzmettiń usynymdary boıynsha 20 myń kásipkerdi qamtyǵan bıznestiń 400-den astam problemalyq keısteri óz sheshimin tapty, dep habarlaıdy QR Sybaılas jemqorlyqqa qarsy is-qımyl agenttiginiń baspasóz qyzmeti.

Sybaılas jemqorlyqqa qarsy qyzmet pen «Atameken» UKP birlesken keńesinde «Bızneske jol» jobasyn iske asyrýdyń aralyq qorytyndysy jasaldy.

Kásipkerler úshin ákimshilik kedergilerdiń eń kóp sany jer qatynastary salasyna jáne ınfraqurylym obektilerine qosylý máselelerine tıesili. Sondaı-aq, salyq jáne memlekettik satyp alý júıelerinde eleýli problemalar bar.
Kásipkerler kóbinese oryndalǵan sharttar úshin ýaqtyly tólem ala almaǵan. Sybaılas jemqorlyqqa qarsy qyzmettiń aralasýynan keıin 220 bıznes sýbektileriniń aldyndaǵy qarjylyq bereshekteri tolyǵymen óteldi.
Bul problemany joıý úshin Qarjy mınıstrligine memlekettik satyp alý portalynyń fýnktsıonalyn pysyqtaý usynyldy. Ol tólemniń keshigýin avtomatty túrde anyqtaýy kerek. Sondaı-aq, akkredıtıv mysalynda qarjylyq kepildikter júıesin jáne laýazymdy tulǵalardyń buzýshylyqtary úshin ákimshilik jaýapkershilik máselelerin engizý usynylady.
Joba aıasynda bıznes úshin júıeli ákimshilik kedergilerdi joıýǵa erekshe nazar aýdarylady.
Mysaly, jer komıssııalarynyń otyrystarynda ákimdikterdiń jerdi jalǵa alýdy uzartý máselelerin zańsyz qaraý faktileri alynyp tastaldy. Bul rette komıssııanyń zań boıynsha mundaı ókilettikteri bolmaıdy.
Sondaı-aq, Agenttiktiń aýmaqtyq departamentteriniń usynymdary boıynsha baqylaýshy organdardyń josparlarynan 360 kásipkerdiń qyzmetinde negizsiz tekserýler alynyp tastaldy.
Jergilikti atqarýshy organdar tarapynan monıtorıng túrindegi jeke baqshalardy negizsiz tekserý toqtatyldy.
Osy baǵyttaǵy jumystar jalǵasýda. Agenttiktiń departamentteri «Sybaılas jemqorlyq táýekelderiniń kartalaryn» eskere otyryp, qazirgi ýaqytta bıznes quqyqtaryna nuqsan keltirgen salalar boıynsha jemqorlyqqa qarsy monıtorıngter men táýekelderine taldaý júrgizedi.