«Bızneske jol» jobasy aıasynda 37 myńnan astam kásipkerdiń quqyǵy qorǵaldy

ASTANA. KAZINFORM — Sybaılas jemqorlyqqa qarsy qyzmet «Bızneske jol» jobasyn iske asyrý barysynda 37 myńnan astam kásipkerdiń quqyǵyn qorǵaǵan. 

 Sybaılas jemqorlyqqa qarsy qyzmet «Bızneske jol» jobasyn iske asyrýdy jalǵastyra beredi. Bul joba shaǵyn jáne orta bıznestiń naqty máselelerin sheshýge baǵyttalǵan.

Joba iske qosylǵan sátten bastap 37 myńnan astam kásipkerdiń quqyqtary qorǵalyp, 768 problemalyq keıs sheshildi.

Aǵymdaǵy jyldyń basynan beri 7 myńnan astam kásipker 83 keıs boıynsha joba aıasynda kómek aldy.

Máselen, Túrkistan oblysynda fermerler úshin sýarmaly sýdyń baǵasyn kótergen deldaldyq fırmalardyń qyzmeti toqtatyldy. Endi sý jetkizýshi («Qazsýshar» ShJQ RMK) sharýashylyqtarmen tikeleı sharttar jasasady, bul baǵany 2 esege (1 myń m3 úshin 766 teńgeden 421 teńgege deıin) tómendetti.

Jetisý oblysynda ákimdik bólingen qarajatty basqa maqsatqa jumsaǵany úshin, tıisti sharttar uzartylmaǵan. Saldarynan 275 mektep tamaqtandyrýshysynyń quqyǵy buzylǵan. Kásipkerler 2 aı boıy balalardy óz esebinen tamaqtandyrýǵa májbúr bolǵan. Sybaılas jemqorlyqqa qarsy qyzmettiń usynysy boıynsha qarjylandyrý qalpyna keltirilip, sharttar uzartyldy.

Joba aıasynda kásipkerlik qyzmetke zańsyz aralasý faktileriniń aldyn alý máselelerine erekshe nazar aýdarylady. Mundaı áreketter úshin sot sheshimi nemese qadaǵalaý organynyń olardy zańsyz dep taný týraly aktisi shyǵarylǵan jaǵdaıda týyndaıtyn ákimshilik jaýapkershilik kózdelgen.

«2023 jyldan bastap Sybaılas jemqorlyqqa qarsy qyzmet 14 adamdy jaýapkershilikke tartty, onyń 7-i zańsyz is-áreketter jasaǵan kezde memlekettik organdarda basshylyq laýazymdardy atqarǵan», — delingen habarlamada.

Mysaly, elordada kásipkerlik qyzmetke zańsyz aralasqany úshin memlekettik kirister basqarmalarynyń eki basshysy aıyppul túrinde ákimshilik jaýapkershilikke tartyldy.

Bıznesti qorǵaý jumystary jalǵasady.