Bızneske jasalatyn qysymǵa quqyq qorǵaý organdary da, prokýratýra da kináli - Jaqyp Asanov

ASTANA. QazAqparat - Qazaqstannyń Bas prokýrory Jaqyp Asanov Qaraǵandyda ótken vedomstvonyń kóshpeli májilisinde shaǵyn jáne orta bızneske qandaı memleketti organdar qysym kórsetetindigin aıtyp berdi, dep habarlaıdy QazAqparat.

«Biz Qaraǵandy oblysyndaǵy shaǵyn jáne orta bıznestiń jaǵdaıyn zerdeleıik dep sheshtik. Óńir tosynnan tańdalyp otyrǵan joq. Bul iri ónerkásiptik nysan, ınfraqurylymy damyǵan. Sondyqtan munda qyzmetkerlerimizdi Bas prokýratýra turǵysynan jaǵdaıdy zerdeleý úshin jibergen edik», - dedi Asanov.

Onyń aıtýynsha, quqyq qorǵaý organdary  men prokýratýra eldegi bıznestiń damýyna barynsha múddelilik tanytady.

«Nelikten múddeli? Óıtkeni, qylmys jasaıtyndardyń 84 paıyzy jumyssyz adamdar. Al jumys ornyn kim qurady? Árıne, eń birinshi kezekte - bıznes. Bızneske jasalyp otyrǵan eń basty qysym - bul qylmystyq qysym. Oǵan quqyq qorǵaý organdary, onyń ishinde prokýratýra da kináli. Joly -  qylmystyq isti tirkep, bıznesti qylmystyq protseske tartý. Bul salyq qyzmetteriniń, sanıtarlyq qadaǵalaý qyzmetteriniń tekserýi emes. Bul tolyqqandy qylmystyq is. Al qylmystyq is aıasynda tintý de, shekteý de, májbúrleý de, tutqyndaý da júrgizýge bolady. Sondyqtan biz ekonomıkalyq qylmystardy tirkeý erejesin ózgerttik. Ótken jyldyń ekinshi jarty jyldyǵynda mundaı ister eki esege azaıdy», - dedi Jaqyp Asanov.

Aıta keteıik, Qaraǵandy oblysynda 85 myń shaǵyn jáne orta bıznes sýbektisi tirkelgen. Onda 225 myń adam eńbek etýde.