Bızneske nesıe berý protsesi tsıfrlandyrylady — Úkimet otyrysy

ASTANA. KAZINFORM — Premer-mınıstr Oljas Bektenov Úkimet otyrysynda «Báıterek» holdınginiń fýnktsııasy keńeıetinin aıtty.

— Basym sektorlarda ınvestıtsııalyq jobalardy belsendi iske asyrý ekonomıkalyq ósimniń negizgi faktorlarynyń biri bolyp qala beredi. Ekinshi deńgeıdegi bankterdiń kapıtalyn naqty sektordy nesıelendirýge tartý otandyq ekonomıkany damytýǵa aıtarlyqtaı serpin beredi.
Birlese otyryp, qosymsha tıimdi qarjy quraldaryn ázirleý, bızneske nesıe berý protsesin ońaılatý jáne tsıfrlandyrý qajet bolady. Ákimshilik kedergilerdi azaıtý jáne ınvestorlarmen jumystyń ıkemdiligin arttyrý korporatıvtik nesıelendirý úlesin ulǵaıtýǵa múmkindik beredi, — dedi Úkimet basshysy.

Oljas Bektenov «Báıterek» ulttyq basqarýshy holdınginiń fýnktsııasy keńeıetinin aıtty.

— Damý ınstıtýty retinde «Báıterek» holdıngi tek jobalardyń operatory ǵana emes, naryq suranystaryn qalyptastyrýǵa jáne birlesken kásiporyndar qurýǵa qabiletti jańa ósý baǵyttarynyń bastamashysy bolýy tıis. Kazakh Invest memlekettik organdar men damý ınstıtýttarynyń barlyq jobalarǵa qoldaý kórsetý baǵytyndaǵy jumysyn tıimdi úılestirý kerek, — dedi Premer-mınıstr.

Aıta ketý kerek, búgin Úkimettiń, Ulttyq Banktiń jáne Qarjy naryǵyn retteý agenttiginiń makroekonomıkalyq turaqtandyrý jáne halyqtyń ál-aýqatyn arttyrý jónindegi 3 jyldyq birlesken is-qımyl baǵdarlamasy tanystyryldy. 

Osyǵan deıin iri qorlar Qazaqstannyń baǵaly qaǵazdaryna 800 mln dollar ınvestıtsııa quıǵany belgili boldy.