Bızneske qoıylatyn Mindetti talaptar tiziliminiń JI júıesi tanystyryldy
ASTANA. KAZINFORM – QR Premer-mınıstriniń orynbasary – ulttyq ekonomıka mınıstri Serik Jumanǵarınniń tóraǵalyǵymen Mindetti talaptar tizilimin engizý máselesi boıynsha keńes ótkizildi. Keńeske memlekettik organdardyń, «Atameken» UKP jáne bıznes-qoǵamdastyqtyń ókilderi qatysty.
Tizilimdi engizý Memleket basshysy Qasym-Jomart Toqaevtyń Qazaqstan halqyna Joldaýyndaǵy shaǵyn jáne orta bıznesti júıeli túrde damytý men kásipkerlerdiń ákimshilik júktemesin azaıtý qajettigi týraly tapsyrmasyn oryndaý úshin júzege asyrylyp otyr.
Keńestegi basty oqıǵa – Ádilet mınıstrliginiń Ulttyq ekonomıka mınıstrligimen birlesip ázirlegen JI júıesiniń tusaýkeseri. Tsıfrlyq sheshim arqyly bızneske qoıylatyn talap úsh kózden: zańnamadan, tekserý paraǵynan jáne ruqsat berý qujatynan avtomatty túrde alynady. Júıe naqty ýaqyt rejıminde qaıtalanýdy, qarama-qaıshylyq pen jónsiz retteýdi anyqtaýǵa múmkindik beretin biryńǵaı derekter tobynan turady.
Ázirleýshilerdiń aıtýynsha, ekologııa, kólik pen jerdi paıdalaný salasyndaǵy pılottyq testileý sheńberinde algorıtmniń dáldigi 93-95%-ǵa jetti. Búgingi tańda júıege zańnan 67 myńdaı, tekserý paraǵynan 64 myń talap júktelgen.
Jumys 12 basym baǵyt boıynsha júrgizilýde. Retteýdiń eń úlken kólemi, shamamen 14 myń talap, densaýlyq saqtaý salasynda tirkeldi.
Júıeni engizý arqyly jasyryn normalar men túsiniksiz túsindirýler joıylyp, kásipkerler qyzmetti iske qosý men júzege asyrý talaptarynyń naqty tizbesimen bıznesti júrgizýdiń «daıyn stsenarııin» ala alady.
Sonymen qatar, Memleket basshysynyń Mindetti talaptar tizilimin engizý jónindegi tapsyrmasyn oryndaý úshin qurylǵan Bızneske qoıylatyn talaptardy tekserý jónindegi jobalyq keńseniń jumysy jalǵasýda. Jobalyq keńseniń jumysy sheńberinde Ulttyq ekonomıka mınıstrligi memlekettik organdarmen jáne «Atameken» UKP-men birlesip, bıznestiń jáne sarapshylardyń qatysýymen normalardy ádisnamalyq súıemeldeýdi jáne praktıkalyq pysyqtaýdy qamtamasyz etti. Tekserý tásili barynsha nátıjeli: qaralǵan 180 talaptyń 50-i memlekettik organdardyń qoldaýyna ıe boldy. Bul qaıtalanatyn jáne mańyzy joq normalardy alyp tastaýǵa múmkindik beredi.
Qazaqstan kásipkerler forýmy tóraǵasynyń orynbasary Gúlnar Qýanǵanova Jobalyq keńseniń jumysy normalardyń qaıtalanýyn joıýǵa jáne naqtylaýǵa baǵyttalǵanyn atap ótti.
«Eki aı boıy qaýyrt jumys júrgizildi. Ónerkásiptik qaýipsizdikke erekshe nazar aýdarylyp, túrli vedomstvonyń túrli talaptaryn biryńǵaı qujatqa shoǵyrlandyrý usynyldy», — dedi ol.
Bul rette azamattardyń ómiri men densaýlyǵynyń qaýipsizdigine qatysty normalar qaıta qaraýǵa jatpaıtyny belgili.
Keńes qorytyndysynda Serik Jumanǵarın memlekettik organdarǵa eki apta ishinde «Atameken» UKP bazasynda JI júıesin verıfıkatsııalaý men «oqytýǵa» salalyq sarapshylardy qatystyrýdy tapsyrdy.
«Bizde derekter bazasy zańǵa táýeldi aktilerge deıin tsıfrlandyrylǵan. Júıe algorıtm boıynsha talaptardy taýyp alady. Bolashaqta protsess avtomatty túrde júrýi úshin mashınany úıretý kerek. Bul basym mindet. Oqý kezeńi aıaqtalysymen, júıe barlyq derekter tobyn óz baqylaýyna alady», — dep atap ótti vıtse-premer.
Aıta keteıik, Oljas Bektenov ınvestorlardyń quqyqtaryn qorǵaý máseleleri boıynsha keńes ótkizdi.
