Bızneske qoldaý kórsetý jáne súıemeldeý ortalyqtary pılottyq rejımde iske qosyldy
ASTANA. KAZINFORM - «Damý» kásipkerlikti damytý qory» AQ Astana, Almaty jáne Shymkent qalalarynda, sondaı-aq Soltústik Qazaqstan jáne Aqtóbe oblystarynda bızneske qoldaý kórsetý jáne súıemeldeý ortalyqtarynyń jumysyn pılottyq rejımde bastady, dep habarlaıdy QR Ulttyq ekonomıka mınıstrliginiń baspasóz qyzmeti.
«Damý» qory jumys formatyn keńeıtý jáne bıznesti keshendi súıemeldeý tetigin engizý múmkindigin qarastyryp jatyr. Bul tásil kásipkerlerge bıznesti damytýǵa qatysty máselelerdi sheshý barysynda memlekettik organdarmen, qarjy ınstıtýttarymen jáne basqa da uıymdarmen ózara is-qımyldy neǵurlym yńǵaıly uıymdastyrýǵa múmkindik beredi.
-Ortalyqtardyń jumysy mynadaı tártippen uıymdastyrylady: kásipker aldymen «Damý» qorynyń óńirlik fılıalyna júginedi. Munda mamandar jaǵdaıǵa bastapqy taldaý júrgizip, máseleni sheshýdiń yqtımal tetikterin aıqyndaıdy jáne odan ári súıemeldeý baǵytyn belgileıdi. Ótinishtiń sıpatyna qaraı keısti qaraýǵa beıindi memlekettik organdar, qarjy ınstıtýttary, jergilikti atqarýshy organdar jáne «Báıterek» holdıngi tobyna kiretin uıymdar tartylady. «Damý» qory qatysýshylardyń ózara is-qımylyn úılestirip, kásipkerdiń máselesi boıynsha sheshim qabyldanǵanǵa deıin ony súıemeldeıdi. Osylaısha, kásipkerge árbir memlekettik organǵa nemese uıymǵa jeke-jeke júginýdiń qajeti bolmaıdy,-delingen habarlamada.
Sondaı-aq onda pılottyq joba aıasynda bıznestiń qarjylyq turaqtylyǵyna jáne onyń qyzmetin jalǵastyrýyna tikeleı áser etetin máselelerge basymdyq beriletini aıtylǵan.
Atap aıtqanda, kásipkerlerge mynadaı máseleler boıynsha qoldaý kórsetiledi:
• bereshekti qaıta qurylymdaý jáne qarjylandyrýǵa qol jetkizý;
• memlekettik qoldaý sharalaryn alý;
• salyq bereshegin retteý;
• ótkizý naryqtaryna qoljetimdilikti qalpyna keltirý jáne ónimdi ilgeriletý;
• kásipkerlik quzyretterdi damytý;
• agroónerkásiptik keshen sýbektilerin memlekettik qoldaý jáne qarjylandyrý.
Bul baǵyttar «Atameken» UKP tizilimindegi shaǵyn jáne orta bıznes sýbektileriniń 2,4 myńnan astam problemalyq ótinishin taldaý nátıjesinde aıqyndaldy. Olardyń 600-den astamy pılottyq joba iske asyrylatyn bes óńirden túsken. Kásipkerlerdiń basym bóligi qarjylandyrý jáne bereshekti qaıta qurylymdaý, memlekettik qoldaý sharalaryn alý, salyq salý, ónimdi ótkizý jáne bıznesti damytý máseleleri boıynsha júgingen. Basty ólshem: máseleniń sheshilýi Dástúrli konsýltatsııalyq formattan aıyrmashylyǵy,
Ortalyqtardyń tıimdiligi eń aldymen naqty nátıjege qaraı baǵalanady. Negizgi kórsetkish retinde kásipkerlerdiń sheshimin tapqan ótinishteriniń úlesi, bıznestiń qarjylandyrý men ótkizý naryqtaryna qoljetimdiligin qalpyna keltirýge kórsetilgen járdem, problemalyq kredıtter men salyq máselelerin sheshý, sondaı-aq ótinishterdi qaraý merzimderiniń saqtalýy eskeriletin bolady.
Sonymen qatar Ortalyqtar bızneste jıi qaıtalanatyn máseleler boıynsha taldaý júrgizedi. Bul júıeli kedergilerdi anyqtaýǵa jáne qoldanystaǵy qoldaý sharalary men zańnamany jetildirý jóninde usynystar ázirleýge múmkindik beredi.
Pılottyq joba 2026 jyldyń sońyna deıin jalǵasady. Onyń qorytyndysy boıynsha jańa tetiktiń tıimdiligi baǵalanyp, ony elimizdiń basqa óńirlerinde odan ári engizý jáne aýqymyn keńeıtý jóninde usynystar ázirlenedi.
Bızneske qoldaý kórsetý jáne súıemeldeý ortalyǵyna pılottyq joba iske asyrylatyn bes óńirdegi «Damý» qorynyń óńirlik fılıaldary arqyly júginýge bolady. Óńirlik fılıaldardyń mekenjaılary men baılanys derekteri Qordyń resmı saıtynda qoljetimdi. Sondaı-aq aqparatty 1408 nómiri boıynsha Biryńǵaı baılanys ortalyǵynan alýǵa bolady.
Osyǵan deıin eldegi áleýmettik kásipkerlik sýbektileriniń sany 1577-ge artqany týraly jazdyq.
