Bızneske qolaıly óńirler reıtıngin usyný merzimi ózgeredi – Prezıdent Jarlyǵy

ASTANA. QazAqparat – Bıznes úshin qolaıly jaǵdaı jasalǵan óńirlerdiń reıtıngin qurý merzimi ózgeredi. Bul týraly QR Joǵary aýdıtorlyq palatasy ázirlegen Prezıdent Jarlyǵynyń jobasynda jazylǵan, dep habarlaıdy QazAqparat tilshisi.

«Uıymdastyrýshy jyl saıyn 20 maýsymnan keshiktirmeı Qazaqstan Respýblıkasy Prezıdentiniń Ákimshiligine reıtınginiń nátıjeleri boıynsha materıaldardy usynady», - delingen jańa redaktsııada.

Aıta keteıik, qoldanystaǵy zańnama talaby boıynsha reıtıng qortyndysy 30 qazannan keshirktilmeı Prezıdent Ákimshiligine joldanady. Endi bul merzim 20 maýsymǵa aýystyrylady.

«QR Prezıdentiniń 2023 jylǵy 20 naýryzdaǵy tapsyrmasyn oryndaý sheńberinde bıznesti júrgizýdiń jeńildigi boıynsha óńirlerdiń reıtıngin ótkizý merzimin ońtaılandyrý usynylady. Bul ózgeris óńirlerdegi kásipkerlik ortanyń ózgerýine jedel den qoıýǵa múmkindik beredi. Óıtkeni, statıstıkalyq jáne áleýmettanýshylyq ólshemderdiń nátıjelerin sınhrondaý qamtamasyz etiletin bolady. Jarlyq jobasyn qabyldaý respýblıkalyq bıýdjetten qarjy shyǵynyn talap etpeıdi jáne teris áleýmettik-ekonomıkalyq nemese quqyqtyq saldarǵa ákep soqtyrmaıdy», - dep Jarlyq jobasyna túsindirme bergen QR Joǵary aýdıtorlyq palatasy.

Qujat 20 sáýirge deıin kópshilik talqylaýda bolady.