Bızneske qolaıly oblystaryń reıtıngin qalyptastyrý merzimi ózgerdi

ASTANA. QazAqparat – Memleket basshysy Qasym-Jomart Toqaev ózgertis engizilgen «Bıznesti júrgizý jeńildigi boıynsha óńirler men qalalar reıtıngi jáne onyń qorytyndylary boıynsha arnaıy syılyq berý týraly» Prezıdent Jarlyǵyna qol qoıdy, dep habarlaıdy QazAqparat tilshisi.

«Uıymdastyrýshy jyl saıyn 20 maýsymnan keshiktirmeı Qazaqstan Respýblıkasy Prezıdentiniń Ákimshiligine reıtınginiń nátıjeleri boıynsha materıaldardy usynady», - delingen Prezıdent qol qoıǵan Jarlyqta.

Aıta keteıik, qoldanystaǵy zańnama talaby boıynsha reıtıng qortyndysy 30 qazannan keshirktilmeı Prezıdent Ákimshiligine joldanady. Endi bul merzim 20 maýsymǵa aýystyryldy.

«QR Prezıdentiniń 2023 jylǵy 20 naýryzdaǵy tapsyrmasyn oryndaý sheńberinde bıznesti júrgizýdiń jeńildigi boıynsha óńirlerdiń reıtıngin ótkizý merzimin ońtaılandyrý usynylady. Bul ózgeris óńirlerdegi kásipkerlik ortanyń ózgerýine jedel den qoıýǵa múmkindik beredi. Óıtkeni, statıstıkalyq jáne áleýmettanýshylyq ólshemderdiń nátıjelerin sınhrondaý qamtamasyz etiletin bolady», - dep Jarlyq jobasyna túsindirme bergen QR Joǵary aýdıtorlyq palatasy.