Bızneske qatysty tekserister birden 30 paıyzǵa qysqarady - mınıstr

ASTANA. QazAqparat - Úkimettiń búgingi otyrysynda QR Ulttyq ekonomıka mınıstri Tımýr Súleımenov kásipkerlik qyzmetti retteýge arnalǵan ózgeristerdi tanystyrdy. Mınıstrdiń sózine qaraǵanda, arnaıy zań jobasy aıasynda 13 kodeks pen 103 zańǵa 1000-nan astam ózgerister men tolyqtyrýlar engiziledi, dep habarlaıdy QazAqparat tilshisi.

«Birinshiden, baqylaý sharalary túbegeıli ózgeredi. Zań aıasynda «profılaktıkalyq baqylaý» degen túsinik engiziledi. Atalǵan reforma tekserýshilerdiń saıasaty men psıhologııasyn ózgertýi tıis. Endi, jazalaý qaǵıdatynan buryn tártip buzýshylyqtyń aldyn alýyna basymdyq jasalady. Bul degenimiz, birden aıyppul salynbaıdy, aldymen kemshilikti joıýǵa ýaqyt beriledi», - deıdi Súleımenov.

Budan bólek, qazirgi 114 baqylaý salasynyń 27-si qysqartylady. Sosyn memlekettik organdardyń bir-birin qaıtalaıtyn 137 qadaǵalaý fýnktsııasyn múldem alyp tastaıdy. Mınıstrdiń aıtýynsha, atalǵan sharalardyń aıasynda 1137 shtattyq birlik basqa jumysqa aýystyrylatyn bolady. «Sondaı-aq, zań aıasynda bıznesti tekserýge jatatyn 17,5 myń talapty alyp tastaý josparlanyp otyr. Qazirgi kezde ondaı talaptardyń sany 30 myńdy quraıdy. Demek, tekseriske qatysty talaptardyń jartysynan kóbi joıylady. Máselen, sanıtarlyq-epıdemıologııalyq qaýipsizdikke qatysty talaptardyń 85 paıyzyn, al órt qaýipsizdigi boıynsha talaptardyń 72 paıyzyn alyp tastaımyz», - dep atap kórsetti Tımýr Muratuly.

Aıta ketken jón, kásipkerlik qyzmetti retteýge arnalǵan jańa zań kelesi jyldan bastap kúshine enedi. Sonyń nátıjesinde tekseristerdiń sany birden 30 paıyzǵa qysqarady. 

Sondaı-aq, kásipkerlik nysandardyń ınjenerlik jelilerge qosylýyn barynsha jeńildetý kózdelgen. Ol úshin monopolıster tarapynan ruqsat qaǵazdardy berýdiń naqty merzimi belgilenedi. Atalǵan qyzmetterdi «Azamattarǵa arnalǵan úkimet» memlekettik korporatsııasy, ıa bolmasa, «elektrondy úkimet» portaly arqyly iske asyrý josparlanǵan. Osylaısha, kásipkerlerdiń shyǵyndaryn barynsha azaıtý qarastyrylyp otyr.

«Shyny kerek, bıznesti baqylaý salasyna alǵash ret mundaı kúrdeli revızııa jasalyp otyr. Máselen, órt pen sanıtarlyq-epıdemıologııalyq qaýipsizdik salasynda tekserister óte kóp. Sebebi shaǵyn bıznestiń basym bóligi saýda, qoǵamdyq tamaqtaný jáne taǵy basqa qyzmet kórsetý boıynsha jumys istep keledi. Olarǵa ońaı emes. Endi, osy saladaǵy tekserister kúrt tómendese, jumys jeńildenedi. Monopolısterdiń ruqsattaryn retteý jaǵy da jaqsy atqaryldy. Jalpy, jańa zań aıasyndaǵy ózgerister otandyq bıznestiń damýyna oń áserin tıgizedi. Negizi osyndaı revızııalardy jyl saıyn jasap otyrý qajet», - deıdi «Atameken» UKP basqarma tóraǵasy Abylaı Myrzahmetov.