Bızneske qatysty zańsyz sheshimderdi joıýda, prokýrorlyq súzgi mańyzdy – Úkimet basshysy

ASTANA. KAZINFORM – QR Premer-Mınıstri Oljas Bektenov ınvestorlardyń quqyǵyn qorǵaýda bıznestiń de múddesi mańyzdy ekenin aıtty.

«Eń mańyzdy basymdyqtyń biri – otandyq ónerkásipti damytý. Otandyq kompanııalar iri ınvestorlarmen jetkizý tizbeginde jumys isteı otyryp, tájirıbe jınap, sapa standarttaryn arttyrady. Mýltıplıkatıvti iri ınvestıtsııalyq jobalar ártaraptandyrylǵan ekonomıkalyq ekojúıeniń qalyptasýyna yqpal ete otyryp, shaǵyn jáne orta bıznes beldeýiniń damýyna áser etedi. Elimizdegi sheteldik óndiristerdiń damýymen ónimderdegi qazaqstandyq qamtýdyń úlesin arttyrýǵa talpynamyz. Otandyq ónerkásipti ilgeriletý maqsatynda satyp alýdaǵy offteık-kelisimsharttardyń úlesin 10%-ǵa deıin jetkizý josparlanýda», - dedi Oljas Bektenov elordada ótip jatqan «Jahandyq ınvestıtsııalyq úrdister: bolashaqty paıymdaý» atty forým barysynda. 

Premer-mınıstr otandyq kadrlardy daıarlaý men qoldaý máselesine erekshe kóńil bólinetinin aıtty. Kún tártibinde aldymen otandyq mamandardy eńbekpen qamtý. 

Odan ári Úkimet basshysy otandyq jáne sheteldik ınvestorlardyń quqyǵyn qorǵaýdy qamtamasyz etý úshin tıisti jaǵdaı jasalatynyn tilge tıek etti. 

«Qazaqstan ınvestorlarǵa «Astana» halyqaralyq qarjy ortalyǵynda jáne ulttyq quqyqtyq júıede aǵylshyn quqyǵy arasyndaǵy tańdaýdyń biregeı múmkindigin usyna otyryp, monopolııadan ıýrısdıktsııaǵa sanaly túrde kóshti. Investorlardy qorǵaýdyń taǵy bir mańyzdy quraly – bızneske qatysty zańsyz sheshimderdi joıý, bul jaǵdaıda prokýrorlyq súzgi mańyzdy. Biz ınvestıtsııalardy kótermeleý jáne ózara qorǵaý týraly halyqaralyq kelisimderge qol qoıdyq. Osy sekildi kelisimder 51 elmen jasaldy», - deıdi Oljas Bektenov. 

Buǵan deıin habarlaǵanymyzdaı, Qazaqstanda ınvestıtsııalyq saıasattyń jańartylǵan tujyrymdamasy qabyldanady.