Bızneske qatysty júrgizilgen 75 salyqtyq tekserý zańsyz dep tanyldy – Bas prokýratýra

Bas prokýratýranyń Quqyqtyq statıstıka jáne arnaıy esepke alý jónindegi komıtetiniń usynýy boıynsha bızneske qatysty 75 salyqtyq tekserý zańsyz dep tanylyp, 60-qa jýyq kásipkerdiń quqyqtary qorǵaldy.

Bul týraly Kazinform Qazaqstan Respýblıkasy Bas prokýratýrasynyń Quqyqtyq statıstıka jáne arnaıy esepke alý jónindegi komıtetiniń baspasóz qyzmetine silteme jasap habarlaıdy.

Baspasóz qyzmetiniń málimetterine zańsyz tekserýlerdiń anyqtalýyna Qarjy mınıstrligi Memlekettik kirister komıtetiniń aýmaqtyq bólimshelerinde tekserýlerdi tirkeý zańnamasy talaptarynyń saqtalýyna júrgizilgen tekserý negiz boldy.

Memlekettik kirister organdarynyń qyzmetin tekserý barysynda Salyq jáne Kásipkerlik kodeksteriniń normalarynda kózdelgen teserýlerdi taǵaıyndaý jáne júrgizý tártibi boıynsha 300-den astam óreskel zańbuzýshylyqtar anyqtaldy.

Atap aıtqanda, ýákiletti organda tekserýlerdiń tirkelmeı júrgizilýi jáne onyń aktileriniń ýaqtyly berilmeýi, zańdy kúshi joıylǵan tekserý paraqtarynyń qoldanylýy, tekserý merzimderiniń buzylýy sııaqty zańbuzýshylyqtar oryn aldy.

Anyqtalǵan buzýshylyqtar baqylaýshy memlekettik organ tarapynan negizsiz qysym jasaǵanyn bildiredi, bul jaǵdaı eldegi bıznestiń damýyna kedergi keltiredi.

Qabyldanǵan prokýrorlyq qadaǵalaý sharalarynyń nátıjesinde 45 laýazymdy tulǵa tártiptik jaýapqa jáne 47-si ákimshilik jaýapqa tartyldy.

Osyndaı faktilerge jol bermeý maqsatynda Qarjy mınıstrliginiń Memlekettik kirister komıtetine zańdylyqtyń buzylýyn joıý týraly usyný engizildi.​