«Bızneske arnalǵan úkimet» biryńǵaı terezesi qurylady

NUR-SULTAN. QazAqparat - «Bızneske arnalǵan úkimet» biryńǵaı terezesi qurylady. Bul týraly búgin Úkimet otyrysynda QR Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.

«Kásipkerlikti, básekelestikti damytý jáne memleket menshiginen alý boıynsha keshendi sharalar iske asyrylatyn bolady. Bul – naryqty monopolııasyzdandyrý, ákimshilik jáne ekonomıkalyq kedergilerdi joıý, sondaı-aq bıznestiń memlekettik jáne kvazımemlekettik satyp alýǵa qol jetkizýin qamtamasyz etý. Kásipkerlerdiń memlekettik qoldaý men konsýltatsııalar alýyn ońaılatý maqsatynda «Bızneske arnalǵan úkimet» biryńǵaı terezesi qurylady», - dedi Rýslan Dálenov.

Onyń sózine qaraǵanda, jekeshelendirýge jatatyn nysandardyń tizimi keńeıtiledi. Agroónerkásiptik keshen boıynsha aýyl sharýashylyǵy shıkizatyn qaıta óńdeý jáne agroónerkásiptik keshende memlekettik qoldaýdyń turaqtylyǵyn qamtamasyz etý úshin barlyq jaǵdaı jasalady.

«Osy jyldyń sońyna deıin Sý resýrstaryn basqarý baǵdarlamasy ázirlenedi. Ónerkásip jáne qurylys boıynsha arnaıy ekonomıkalyq jáne ındýstrııalyq aımaqtardy, qaıta óńdeý ónerkásibin tıimdi damytý jóninde, sondaı-aq eńbek ónimdiligin arttyrý jóninde sharalar qabyldanady. Qosylǵan qunnyń jahandyq tizbegine ený jónindegi, sonymen qatar eksportty arttyrý jáne ártaraptandyrý boıynsha sharalar iske asyrylady. Odan basqa, turǵyn úı salý jáne ınfraqurylymdy sapaly damytý boıynsha sharalar qabyldanatyn bolady», - dedi mınıstr.