Bızneske arnalǵan lıtsenzııalar men ruqsattar endi lezde beriledi
ASTANA. KAZINFORM — Qazaqstanda bızneske arnalǵan 12 memlekettik qyzmet avtomatty túrde kórsetiledi, dep habarlaıdy Jasandy ıntellekt jáne tsıfrlyq damý mınıstrliginiń baspasóz qyzmeti.
Tsıfrlandyrýdyń praktıkalyq nátıjeleriniń biri — bızneske arnalǵan lıtsenzııalar men ruqsattardy avtomatty túrde berý. Memlekettik derekter bazalaryn ıntegratsııalaý jáne ákimshilik rásimderdi jeńildetý nátıjesinde aqparattyq júıeler endi qajetti málimetterdi ózdiginen tekserip, buryn birneshe apta ýaqytty qajet etken sheshimderdi qabyldaıdy.
Bul — elektrondyq úkimetten tsıfrlyq memleketke kóshýdiń naqty mysaldarynyń biri. Mundaı jaǵdaıda ótinish berý protsesi ǵana emes, sheshim qabyldaý protsesiniń ózi de tsıfrlandyrylady.
Buryn jekelegen lıtsenzııalar men ruqsattardy alý 15-ten 30 kúntizbelik kúnge deıin sozylatyn. Kásipker qujattardy jınap, olardy memlekettik organǵa tapsyryp, tekserý men sheshim qabyldaýdy kútýi qajet bolatyn.
Endi avtomattandyrylǵan qyzmetter boıynsha elektrondyq ótinish berý jetkilikti. Júıe qajetti málimetterdi memlekettik derekter bazalarynan ózdiginen alady, olardyń belgilengen talaptarǵa sáıkestigin tekseredi jáne barlyq shart oryndalǵan jaǵdaıda oń sheshim qalyptastyrady.
Nátıjesinde buryn birneshe aptaǵa sozylǵan rásim endi lezde oryndalady. Bul rette sheshim memlekettik organ qyzmetkeriniń qatysýynsyz, aldyn ala belgilengen biryńǵaı qaǵıdalar negizinde qabyldanady.
Bul nátıjege qol jetkizý úshin ákimshilik rásimderdi qaıta qaraý, artyq talaptardy joıý, memlekettik aqparattyq júıelerdi ıntegratsııalaý jáne sheshim qabyldaý qaǵıdalaryn tsıfrlyq formatqa kóshirý boıynsha aýqymdy jumys júrgizildi.
Munda bıýrokratııalyq rásimderdi jaı ǵana elektrondyq formatqa kóshirý týraly sóz bolyp otyrǵan joq. Aldymen protsestiń ózi jeńildetilip, artyq kezeńder joıylady, sodan keıin ǵana avtomattandyrý engiziledi. Dál osyndaı tásil bıznestiń memleketpen ózara is-qımyl jasaý logıkasyn ózgertedi.
Kásipkerler úshin bul jańa múmkindikterdi bildiredi: qyzmetin jyldam bastaýǵa, ákimshilik rásimderge az ýaqyt jumsaýǵa jáne obektıvti ári ashyq ólshemsharttar negizinde sheshimder alýǵa múmkindik beredi. Mundaı tásil adamı faktordyń yqpalyn azaıtyp, artyq ákimshilik kedergilerdi joıady.
— Tsıfrlandyrýdyń nátıjesi engizilgen aqparattyq júıelerdiń sanymen emes, azamattar men bıznes úshin bolǵan naqty ózgeristermen ólshenýi tıis. Bizdiń mindetimiz — kásipker memlekette bar málimetterdi qaıta jınap, qolmen tekserýdi kútýge májbúr bolmaıtyn memlekettik qyzmetter modelin qalyptastyrý. Eger sheshimdi shynaıy tsıfrlyq derekter men naqty talaptar negizinde qabyldaýǵa bolsa, ol avtomatty túrde qabyldanýy tıis. Bul — qyzmet kórsetýdi jaı ǵana jedeldetý emes, memleket pen bıznes arasyndaǵy ózara is-qımyldyń sapaly jańa deńgeıi, — dep atap ótti Qazaqstan Respýblıkasy Jasandy ıntellekt jáne tsıfrlyq damý mınıstrligi Memlekettik qyzmetter komıtetiniń tóraıymy Aınur ıÝsýpova.
Sheshimderdi avtomatty túrde qabyldaý tetigi qazirdiń ózinde qurylys, aýyl sharýashylyǵy, syrtqy saýda, ónerkásiptik qaýipsizdik, qorshaǵan ortany qorǵaý jáne basqa da salalarda qoldanylady.
Bul tásildiń aýqymy kórsetilgen qyzmetterdiń sanymen rastalady. 2024 jyldan bastap eLicense.kz portaly arqyly ótinishterdi qolmen qaraýsyz, tekserý jáne sheshim qabyldaý avtomatty túrde júzege asyrylatyn 87 088 memlekettik qyzmet kórsetildi. Búginde mundaı tetik bızneske arnalǵan 12 memlekettik qyzmet boıynsha qoldanylady.
Aldaǵy ýaqytta bul qaǵıdat sheshimderdi tsıfrlyq derekter men belgilengen talaptar negizinde qabyldaýǵa bolatyn basqa da memlekettik qyzmetterge kezeń-kezeńimen engiziledi.
Osyǵan deıin Qazaqstanda shaǵyn bıznesti tekserýge úsh jyldyq moratorıı engizilýi múmkin ekenin jazǵanbyz.
