Bızneske ákimshilik qysymdy azaıtý tetikteri usynyldy
NUR-SULTAN. QazAqparat - QR Indýstrııa jáne ınfraqurylymdyq damý mınıstrligi ónerkásiptik qaýipsizdik máseleleri jónindegi zańnamalyq aktilerge tolyqtyrýlar engizý boıynsha qoǵamdyq tyńdaý ótkizdi, dep habarlaıdy QazAqparat tilshisi.
«Búgingi tańda zań jobasy kelesi maqsattardy kózdeıdi: bızneske ákimshilik qysymdy azaıtý úshin zań boıynsha óndiristik nysandardy qaýipti sanatqa jatqyzý nyshandaryn qaıta qarastyrý jáne qysqartý kózdelgen. Baqylaýǵa alynǵan nysandardyń sany qysqartylady. Qazirgi tańda kásiporyndar apattyq-qutqarý qyzmetterimen qyzmet kórsetý boıynsha shart jasasýy kerek. Osyny eskere otyryp, elektr jelisi sharýashylyǵy, densaýlyq saqtaý jáne bilim salasyndaǵy nysandardy qaýipti óndiristik nysandardyń sanatynan alyp tastaý, atom energııasyn qoldanatyn nysandardy, avtokólikterge janarmaı quıý stantsııalaryn, nan qabyldaý pýnkterin kásibı apattyq-qutqarý qyzmetterimen qyzmet kórsetý boıynsha mindetti shart jasasýdan bosatý usynylady», - deıdi IIDM Indýstrııalyq damý jáne ónerkásiptik qaýipsizdik komıteti tóraǵasynyń orynbasary Nyǵmetjan Maqajanov.
Onyń aıtýynsha, zań jobasy sonymen qatar ónerkásiptik qaýipsizdik salasyndaǵy zańnama normalaryn jetildirýge jáne ónerkásiptik qaýipsizdik salasyndaǵy memlekettik qadaǵalaýdy júzege asyrýdyń tıimdiligin arttyrýǵa baǵyttalǵan. Sondaı-aq, zań jobasy ónerkásiptik qaýipsizdik salasynda memlekettik qadaǵalaýdy júzege asyrý kezinde sybaılas jemqorlyq táýekelderin azaıtýdy kózdeıdi.
«Budan bólek, ónerkásiptik qaýipsizdik salasyndaǵy jumystardy júrgizý quqyǵyna attestattalǵan uıymdardyń jáne apattyq-qutqarý qyzmetteriniń jumysyn retteý úshin profılaktıkalyq qadaǵalaýdy júzege asyrý jáne ony júrgizý tártibin belgileý qarastyrylǵan. Keńinen talqylaý úshin Zań jobasynyń mátini «Ashyq normatıvtik quqyqtyq aktiler» portalyna ornalastyrylǵan. Onda qalaǵan adam óz usynystary men eskertýlerin qaldyra alady.Barlyq usynystar kelesi joly zań jobasyn pysyqtaǵan kezde eskeriletin bolady», - deıdi ol.
Zań jobasyn ázirleý barysynda 300-ge jýyq usynys kelip túsken.
