Bızneske 6,5 myńnan astam basy artyq talap qoıylyp kelgen – Memleket basshysy

ASTANA. QazAqparat – Prezıdent Qasym-Jomart Toqaev «Altyn sapa» jáne «Paryz» syılyqtarynyń ıegerlerin marapattaý saltanatynda sóılegen sózinde bıznesti retteýdiń jańa saıasaty qalaı iske asatynyn túsindirdi, dep habarlaıdy QazAqparat tilshisi.

«Biz aldaǵy 7 jylda kásipkerlik belsendilikti shekteıtin barlyq kedergini joıýǵa kúsh salamyz. Memleket bıznesti órkendetý úshin naqty sharalar qabyldaı beretin bolady.

Birinshi – bıznesti retteýge baǵyttalǵan jańa tásilder. «Taza paraqtan bastaý» atty retteý ınstıtýtyn engizýge bir jyl qaldy. Búgin Úkimet bıznestiń damýyna kedergi keltiretin basy artyq talaptardy anyqtaý boıynsha aýqymdy jumys júrgizdi.

Qazirdiń ózinde ekonomıkanyń túrli salasynda jańa retteý saıasatyna sáıkes kelmeıtin 6,5 myńnan astam talap belgili boldy», - dedi Prezıdent.

Sondaı-aq, Memleket basshysy Úkimetke osy máseleni retteý týraly tapsyrma berdi.

«Endi Úkimetke «Atameken» palatasymen birge zańnamalyq jáne normatıvtik-quqyqtyq aktilerge tıisti ózgerister engizý qajet», - dedi Qasym-Jomart Toqaev.

Aıta keteıik, osynaý saltanatty shara aıasynda úzdik dep tanylǵandarǵa «Qazaqstannyń úzdik taýary», «Qazaqstan Project Management Awards -2022», «TMD boıynsha sapa salasyndaǵy 2021 jyldyń syılyǵy» sııaqty kásipkerlik baǵyttaǵy marapattar da tabystaldy.

Sondaı-aq, «ArýAna», «Bıznes Kemeldilik», «Іsker», «Uly dala eli» syılyqtarynyń jeńimpazdary da marapattaldy.

Bıyl «Altyn sapa» syılyǵyna 281 úmitker ótinim tapsyrǵan. Sarapshylar sonyń ishinen iri, orta jáne shaǵyn bıznes boıynsha 14 bıznes nysanyn 4 atalym negizinde iriktep aldy.