Bızneske 12,6 paıyzben 8 trln teńge nesıe berý ınflıatsııany órshitpeı me – Ulttyq bank jaýaby

ASTANA. KAZINFORM – Ulttyq bank tóraǵasy Tımýr Súleımenov Úkimettiń «Báıterek» ulttyq basqarý holdıngi arqyly bızneske 12,6 paıyzben 8 trln teńge nesıe berý týraly sheshimi ınflıatsııaǵa qalaı áser etetinin aıtty.

- Bazalyq mólsherlemeden 4 paıyz arzan nesıeni 8 trln teńge kóleminde bólý Ulttyq bankti bazalyq mólsherlemeni kóterýge májbúrlemeı me? Bızneske bazalyq mólsherlemeni aınalyp ótetin qoldaý kórsetý ekonomıkanyń basqa salalaryna qatysty ádiletsiz sheshim dep oılamaısyz ba, - dep surady jýrnalıst.

Ulttyq bank tóraǵasy bazalyq mólsherleme týraly búgingi sheshim «Báıterektiń» 12,6 paıyzdyq nesıesin eskere otyryp qabyldanǵanyna sendirdi.

- Árıne, biz Premer-mınıstr aıtqan usynysty bilemiz. Bizdiń búgingi sheshimimiz Úkimettiń ol bastamasyn esepke ala otyryp qabyldandy. Inflıatsııa táýekelderin baǵalaǵan 12,6 paıyzben bızneske beriletin 8 trln teńgeniń yqpalyn da eseptedik.

Tutas ekonomıkadan bıznesti bólip alyp, bazalyq mólsherlemeden tómen mólsherlememen nesıe berý qanshalyqty ádil degenge kelsek, bul óte sezimtal ári kúrdeli másele. Bul 8 trln teńge «Báıterek» Ulttyq basqarý holdıngi arqyly beriledi. Olar nesıeni baǵyttaıtyn jobany iriktep alady. Demek ony tańdaýdyń naqty erejesi bar. Sondyqtan ádilettilik týraly suraqty holdıng ókilderine qoıǵan jón, - dedi Tımýr Súleımenov.

Eske salaıyq, búgin Ulttyq bank bazalyq mólsherlemeni taǵy ózgerissiz qaldyrdy.