Bıznes úshin taǵy bir mańyzdy talap engiziledi
ASTANA. QazAqparat - QR Investıtsııalar jáne damý mınıstri Jeńis Qasymbektiń aıtýynsha, energııany únemdeýge qatysty talapty memlekettik baǵdarlamaǵa engizý josparlanyp otyr, dep xabarlaıdy QazAqparat tilshisi.
«Qazirgi kezde biz taǵy bir jańalyqty engizýdi usynyp otyrmyz. Ol - memlekettik qoldaýǵa ıe bolý úshin energııa únemdeý sharalaryn ótkizý talaby. Máselen, qandaı da bir kásiporyn memleketten qarjylaı, ıa bolmasa, basqa da kómek surasa, energııany únemdeý boıynsha nendeı sharalardy atqarǵanyn kórsetýi kerek. Osy oraıda, biz Indýstrıaldyq-ınnovatsııalyq damý baǵdarlamasyna tıisti ózgeristerdi ázirlep jatyrmyz", - dedi J. Qasymbek Úkimettiń búgingi otyrysynda.
Aıta keteıik, Qazaqstannyń 2020 jylǵa deıingi strategııalyq damý jospary men jasyl ekonomıkaǵa kóshý tujyrymdamasy aıasynda aldaǵy úsh jylda jalpy ishki ónimdegi energııa syıymdylyǵyn, kem degende, 25 paıyzǵa tómendetý qajet. Al 2050 jylǵa deıin energııany únemdeý kólemi 50 paıyzǵa jetýi tıis.
