Bıznes úshin lıtsenzııalarmen ruqsat qaǵazdaryn 30 paıyzǵa qysqartý josparlanýda - Q.Kelimbetov
ASTANA. 10 mamyr. QazAqparat /Rýslan Ǵabbasov/ - Bıznes úshin lıtsenzııalarmen ruqsat qaǵazdaryn 30 paıyzǵa qysqartý josparlanýda.
Bul týraly búgin Úkimet otyrysynda QR Ekonomıkalyq damý jáne saýda mınıstri Qaırat Kelimbetov aıtty.
Memleket basshysynyń tapsyrmasyn oryndaý maqsatynda mınıstrlik memlekettik organdardyń lıtsenzııalaý-ruqsat berý júıesin jáne baqylaý-qadaǵalaý qyzmetin odan ári reformalaý boıynsha tujyrymdamalyq usynystar ázirlegendigin aıta kele: «Olar Ekonomıkalyq saıasat jónindegi keńesiniń taıaýdaǵy otyrysynda qaralatyn bolady. Ruqsat berý júıesi boıynsha jumysty 2 kezeńde júrgizý kózdeledi. Birinshi kezeń - lıtsenzııalar men ruqsat qaǵazdaryn 30 paıyzǵa qysqartý», - dedi.
Mınıstrdiń atap ótýinshe, Premer-Mınıstr ókimimen qurylǵan Saraptaý tobynyń kestesine sáıkes, 10 mamyrdan bastap memlekettik organdardyń ruqsat qaǵazdardy qysqartý boıynsha usynystary qarala bastaıdy. Atalǵan jumysty kásipkerler birlestikteriniń qatysýymen bir aıdyń ishinde aıaqtaý josparlanyp otyr.
«Memlekettik organdardyń sapaly usynystar berý jáne Memleket basshysynyń osy rettegi tapsyrmalaryn oryndaý qajettiligine nazar aýdaramyn. Óńirlik deńgeıde osyndaı jumysty uıymdastyrý úshin aǵymdaǵy jyly 13 mamyrda oblys ákimdikterimen keńes ótkizý kózdelip otyr», - dedi Q.Kelimbetov.
Onyń aıtýynsha, birinshi kezeńdegi jumys qorytyndylary boıynsha Elbasyna naqty usynystar ázirlenedi. Olar maquldaǵannan keıin tıisti zań jobasy ázirlenip,Parlamentke aǵymdaǵy jyldyń 3 toqsanynda engiziledi.
