Bıznes trenıngten túsken qarjydan paıda tappaq bolǵan aqtóbelikter aldanyp qaldy
AQTÓBE. KAZINFORM — Onnan astam jábirlenýshi kásipker Juldyz Qapanovanyń ústinen aryz túsirdi. Sottalýshy túrli semınar ótkizip, bıletten túsken aqshadan paıda tabatynyn aıtyp, sendirgen.
Qylmystyq is № 2 Aqtóbe qalalyq sotynda qaraldy. Barlyǵy 14 jábirlenýshi kásipker Juldyz Qapanovaǵa aldanǵanyn aıtyp, shaǵym túsirdi. Oǵan Qylmystyq kodekstiń «Alaıaqtyq» baby boıynsha aıyp taǵyldy.
Іs materıalyna súıensek, Juldyz Qapanov «Zhuldyz Business Intelligence Community», «Connect and grow» bıznes qaýymdastyqtaryn qurady. Qaýymdastyq kásipkerlerdi qoldaýǵa, biliktiligin arttyrýǵa, baılanys ornatýǵa arnalǵan orta ekenin aıtyp, kópti sendiredi. Alaıda onyń óziniń bul salada tájirıbesi bolmady, lıtsenzııasy da joq. Instagram áleýmettik jelisi arqyly jarnama taratyp, túrli shara uıymdastyrady. Sharaǵa qatysýdyń, spıker bolýdyń óz aqysy bar. Kelisimshart jasaý kezinde anasynyń atyna jazylǵan jeke kásipkerliktiń móri qoıylady. Kelisim bolǵanymen, qatysýshylardyń aqshasy qorǵalmaǵan.
Sottalýshy Juldyz Qapanova Aqtóbe qalasynda G.Beketaevamen kezdesedi. Kezdesýde bıznes trenıng ótkizetinin, bılet aqshasy arqyly qarjyny kóbeıtýge múmkindik jasaıtynyn aıtty. Máselen 1 600 000 teńge salsa, ony 2 000 000 teńge etip kóbeıtedi. Jábirlenýshi senip, 2022 jyly bar aqshasyn salady. Kelisim boıynsha belgilengen ýaqytta 2 000 000 teńgeni keri qaıtaryp, senimine kiredi. Keıin sol 2 000 000 teńgeni taǵy eseleýdi oılap, qaıta beredi. Ári sottalýshy suraǵan 1 000 000 teńgeniń ornyna 800 000 teńge aýdarady. Barlyǵy 2 800 000 teńgesinen aıyryldy.
Sottalýshy jymysqy oılaryna anasynyń, qurbysynyń, inisiniń bank kartalaryn da paıdalanǵan. Sot otyrysynda sottalýshy Juldyz Qapanova ózine taǵylǵan aıypty moıyndamady. Jábirlenýshilerdi óziniń bıznes seriktesteri dep sanap, kásipte tabyspen qatar quldyraý da bolatynyn aıtty. Bıznes trenıng ótkizgenimen, bıletterdiń bári sátti ótpegen, saldarynan tabys túspegen. Bıznes trenıng 2022-2025 jyldary aralyǵynda uıymdastyrylǵan.
Sot úkimimen Juldyz Qapanova Qylmystyq kodekstiń «Alaıaqtyq» baby boıynsha aıypty dep tanylyp, 4 jyl 8 aıǵa bas bostandyǵynan aıyryldy. «Raqymshylyq týraly» Zańǵa sáıkes Juldyz Qapanovaǵa túpkilikti 3 jyl 1 aı 10 kúnge bas bostandyǵynan aıyrý jazasy taǵaıyndaldy. Sot úkim shyǵarǵan kezde kámeletke tolmaǵan balalary bar ekenin eskerdi. Sondyqtan ol jazasyn úsh jyldan soń ǵana óteıdi.
Sot jábirlenýshilerdiń azamattyq talap aryzyn ishinara qanaǵattandyrdy. Sottalýshy jábirlenýshilerdiń 1 500 000 — 10 000 000 teńge aralyǵyndaǵy qarjysyn óteıdi.
Aıta keteıik, Aqtóbede avıajóndeý zaýytynyń eks-basshysy sottaldy. Ol zaýytqa keltirgen materıaldyq shyǵyndy óteýi tıis.
