Bıznes salasynyń jumyskerleri órt kezinde áreket etýge úıretilip jatyr
ASTANA. QazAqparat – Bıznes salasynda jumys isteıtinder arasynan órt qaýipsizdigi daıyndyǵynan ótkender sany 1,6 esege artty. Elordadaǵy kommýnıkatsııalar qyzmetindegi brıfıngide Astana qalasy Tótenshe jaǵdaılar departamenti memlekettik órt baqylaý basqarmasynyń basshysy Erkin Otarǵalymuly osylaı aıtty, dep habarlaıdy QazAqparat tilshisi.
«Astana qalasy Tótenshe jaǵdaılar departamenti qyzmetiniń basym baǵyttarynyń biri – kásipkerlik obektilerindegi órtterdiń jáne olardyń saldarynyń aldyn alý. Jalpy qabyldanǵan sharalardyń arqasynda órt qaýipsizdigi salasynda daıyndalǵan halyq sany 1,6 esege artty, daıyndyq júıesine barlyǵy 123 myńnan astam adam tartyldy.
Kásipkerlerge ádistemelik kómek kórsetýdiń tıimdi ádisterin qurý maqsatynda memlekettik organdardyń, kásipkerler palatasynyń, prokýratýranyń jáne sharýashylyq júrgizýshi organdardyń qatysýymen 20 dóńgelek ústel otyrysy men 9 brıfıng ótkizildi. Baqylaý sýbektilerine 2 567 aqparattyq hat tabystaldy. Jalpy 5 977 adamdy qamtı otyryp, 427 jıyn, 12 856 adamdy qamtı otyryp, 960 dáris jáne áńgimeler júrgizildi», - dedi Erkin Otarǵalymuly.
Qosa ketsek, elordadaǵy bıznes obektilerdi tekserý nátıjesinde órt qaýipsizdigi erejelerine sáıkes kelmeıtin 4 195 derek anyqtalyp, jaýapty tulǵalar ákimshilik jaýpkershilikke tartylǵan.
