Bıznes-protsess reınjınırıngi: Onlaın senimhat alý 4 ese ósken

ASTANA. KAZINFORM – Elimizde onlaın formatta senimhat alý 4 ese artqan. Bul týraly Qazaqstan Respýblıkasynyń tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev aıtty. 

— Tsıfrlyq transformatsııa sheńberinde 61 eń tanymal bıznes-protsesterge reınjınırıng júrgizildi. Osynyń arqasynda sot sheshimderin oryndaýmen, zańgerlik keńes berýmen jáne saraptama júrgizýmen baılanysty protsesterdi jańǵyrtýǵa múmkindik týdy. Jalpy, júrgizilgen reınjınırıng qorytyndysy boıynsha biz tıimdiliktiń 54%-ǵa artýyn kútemiz. Bıylǵy jyldyń sońyna deıin taǵy 31 bıznes-protsestiń reınjınırıngin ótkizýdi josparlap otyrmyz, - dedi ol. 

Mınıstrdiń aıtýynsha, buǵan senimhat berý bıznes-protsesine júrgizilgen reınjınırıng jarqyn mysal bola alady. 

— Buryn senimhat alý úshin notarıýstyń jeke qatysýy qajet bolatyn. Sonymen qatar protsess qaǵaz júzinde iske asyrylǵandyqtan qujattardy joǵaltý jáne qoldan jasaý qaýpi boldy. Endi bárin onlaın formatta beıne qońyraý shalý arqyly jasaýǵa bolady. Nátıjesinde biz qoljetimdilikti arttyrdyq, sondaı-aq muraǵatty tsıfrlandyrý esebinen joǵaryda atalǵan táýekelderdi joıdyq. Bul qyzmet halyq arasynda suranysqa ıe jáne oń qabyldandy. Rásimdelgen onlaın-senimhattar sanynyń 4 ese ósýi baıqaldy, - dep túıdi sózin Jaslan Mádıev. 

Eske sala keteıik, buǵan deıin AQSh ınvestory qazaqstandyq ІT-startapqa $1 mln kóleminde ınvestıtsııa quıǵanyn jazǵan edik.