Bıznes pen memleket arasyndaǵy qarym-qatynas tolyǵymen tsıfrlyq formatqa kóshedi
NUR-SULTAN. QazAqparat - Bıznes pen memleket arasyndaǵy qarym-qatynas tolyǵymen tsıfrlyq formatqa, ıaǵnı qarym-qatynassyz júıege kóshedi. Bul týraly búgin QR Prezıdenti Qasym-Jomart Toqaev Tótenshe jaǵdaı rejımin qamtamasyz etý jónindegi memlekettik komıssııanyń otyrysynda málim etti, dep habarlaıdy QazAqparat tilshisi.
«Pandemııadan keıingi jaǵdaıdy paıymdaýǵa sáıkes jańa amal-ádister engiziledi. Jumysty qashyqtan isteýdiń sátti formaty mańyzdy memlekettik sheshimdi qabyldaýda jańa tehnologııalardy qoldanýdyń qajettigin kórsetti. Qalyptasyp qalǵan jańashyldyq retinde Úkimettiń, mınıstrlikter men ákimdikterdiń otyrysy men keńesin barynsha qashyqtan júrgizý formatynda ótkizýdi usynamyn. Qajetsiz sharalardy, maquldaýdy, ýaqyt pen aqshany orynsyz ketirý formatynan alyp tastaý kerek», - dedi Prezıdent.
«Bizge shuǵyl ári jedel sheshim qabyldaıtyn, jaǵdaıdyń qubylýyna jaýap bere alatyn jańartylǵan, tıimdi ári tyǵyz memlekettik apparat kerek. Memlekettik damý ınstıtýttarynyń reformasy jalǵasady. Meniń halyqqa joldaǵan Joldaýymdy júzege asyrý aıasynda olardyń qurylymdaryn reformalaý, mindetteri men maqsattaryn aıqyndaý jumysy jalǵasady. Fýnktsııalardyń keıbiriniń qosarlanýy, jekeshelendirýdiń keıbir suraqtary, otandyq kásipkerlerdiń kvazımemlekettik sektordaǵy satyp alýǵa qoljetimdiligi sekildi máselelerdi sońyna deıin sheshý kerek», - dedi Prezıdent.
Qasym-Jomart Toqaev elektrondy Úkimet tujyrymdamasyn qaıta taldap, keńes, anyqtama alý, ótinim berý operatsııalarynyń bárin tolyǵymen onlaın rejımge kóshirý, al «egov» tilin halyqqa qarapaıym ári túsinikti bolatyndaı etýdi júktedi.
«Bıznes pen memleket arasyndaǵy qarym-qatynas tolyǵymen tsıfrlyq formatqa, ıaǵnı qarym-qatynassyz júıege kóshedi. Osy maqsatta memlekettik qyzmet alýdyń protsesteriniń bárin tsıfrlandyrý jumysy aıaqtalady. Ekonomıka men qoǵamdy tsıfrlandyrý protsesteriniń bárine jańa serpin berýdiń mańyzy zor», - dep túıdi Memleket basshysy.
