Bıznes ókilderi úshin týrızm salasynda qandaı memlekettik qoldaý sharalary bar
ASTANA. KAZINFORM — Týrızm jáne sport mınıstrligi týrızm salasynda kásipkerlik sýbektileri úshin memlekettik qoldaýdyń birneshe túrin usynady. Bul sharalar týrıstik ónimderdiń sapasyn arttyrýǵa, sondaı-aq ishki jáne kelý týrızmin damytýǵa baǵyttalǵan. Bul týraly vedomstvonyń baspasóz qyzmeti málim etti.
2022 jylǵy 1 qańtardan bastap týrızm salasyndaǵy kásipkerlik sýbektilerine memlekettik qoldaýdyń 7 túri qoldanylady. Atap aıtqanda:
1. Kelý týrızmin yntalandyrýǵa arnalǵan sýbsıdııalar
Kelý týrızmimen aınalysatyn otandyq týroperatorlarǵa sheteldik týrısterdi tartqany úshin árbir adamǵa 15 000 teńge kóleminde sýbsıdııa tólenedi. Bul úshin sheteldik týrıstiń elde keminde 4 kún, 3 tún toqtaǵany jáne eQonaq júıesinde tirkelgeni rastaý qajet.
2. Balalarǵa arnalǵan áýe bıletterin sýbsıdııalaý
Іshki týrızmdi damytý aıasynda 18 jasqa deıingi balalar el ishinde tegin ushady. Ol úshin ishki týrızm salasynda qyzmet kórsetetin týroperatordan týr satyp alý qajet. Mundaı jaǵdaıda týrıstik ónim quramyna engizilgen áýe bıletteriniń quny 100% sýbsıdııalanady.
3. Taý shańǵysy kýrorttary úshin jabdyqtar men tehnıka satyp alý
Kásipkerlerge aspaly joldar, qar tazalaý tehnıkasy, jasandy qarmen qamtamasyz etýge arnalǵan jabdyqtar satyp alǵany úshin memleket shyǵynnyń 25% ótep beredi.
4. Jol boıyndaǵy servıs nysandaryn salýǵa jumsalǵan shyǵyndardy óteý
Motelder, janarmaı quıý stantsııalary, tamaqtaný oryndary, dárihanalar jáne ózge de qyzmet kórsetý nysandaryn salýǵa jumsalǵan shyǵyndardyń 10%-y memleket esebinen óteledi.
5. Sanıtarlyq-gıgıenalyq toraptardy (SGT) ustaýǵa arnalǵan sýbsıdııa
Týrıstik aımaqtarda, avtomobıl joldarynyń boıynda jáne erekshe qorǵalatyn tabıǵı aýmaqtarda ornalasqan sanıtarlyq-gıgıenalyq toraptardy ustaýǵa aı saıyn 83 300 teńge kóleminde sýbsıdııa tólenedi.
6. Týrıstik obektilerdi salý nemese jańǵyrtý shyǵyndaryn óteý
Týrıstik qyzmet kórsetý nysandaryn jáne týrısterge qajetti baǵyttarda salynatyn nemese qaıta jańǵyrtylatyn obektilerdi salý shyǵyndarynyń 10%-y sýbsıdııalanady.
7. Týrıstik avtobýstardy satyp alýǵa arnalǵan ótemaqy
Syıymdylyǵy 8 orynnan asatyn (júrgizýshini qospaǵanda) avtobýstardy satyp alý shyǵyndarynyń 25%-y óteledi. Bul rette tehnıka keminde 5 jyl boıy tek týrıstik maqsatta paıdalanylýy tıis.
Atalǵan qoldaý sharalary ishki týrıster aǵynyn ulǵaıtýǵa, kásipkerlerge týrıstik ónimderdi damytýǵa, ınfraqurylymdy jaqsartýǵa jáne qyzmet sapasyn arttyrýǵa múmkindik beredi.
Eske sala keteıik, buǵan deıin sharýalarǵa agrotýrızmmen aınalysýǵa ruqsat beriletinin jazǵan edik.