Bıznes quqyq qorǵaý jáne qadaǵalaý organdary tarapynan qysym kórip otyr

NUR-SULTAN. QazAqparat – Kásipkerler sybaılas jemqorlyq pen sheneýnik qysymynan tolyqqandy ári senimdi qorǵanysqa senim arta alady. Bul týraly QR Sybaılas jemqorlyqqa qarsy is-qımyl agenttiginiń tóraǵasy Alık Shpekbaev aıtty, dep habarlaıdy QazAqparat tilshisi.

«Protecting business and investments» jobasynyń belsendiligi artyp keledi. Búgingi tańda biz jıyntyq ınvestıtsııasy 16 trln teńgeden asatyn 635 kompanııany súıemeldeımiz. Joba iskerlik ahýaldy jaqsartýǵa úles qosty. Transparency Kazakhstan zertteýine sáıkes, saýalnamaǵa qatysqan 5 kásipkerdiń 4-i para bermeı, bıznes júrgizedi», - dedi Alık Shpekbaev agenttiktiń alqa otyrysynda.

Degenmen, ol áli de kóptegen problemalar bar ekendigin basa aıtty.

«Ókinishke qaraı, bıznes quqyq qorǵaý jáne baqylaý-qadaǵalaý organdary tarapynan qysym kórýde. Sondyqtan sheteldik jáne otandyq ınvestorlardy sybaılas jemqorlyqqa qarsy súıemeldeý bizdiń basymdyǵymyz bolyp qala beredi. Árbir parasatty kásipker sybaılas jemqorlyq pen sheneýnik qysymynan tolyqqandy ári senimdi qorǵanysqa senim arta alatynyna sendirgim keledi. Bizdiń esigimiz árdaıym ashyq», - dedi agenttik basshysy.