Bıznes-klass ushaǵy San-Dıegonyń turǵyn úı aýdanyna qulap, órt shyqty

ASTANA. KAZINFORM — AQSh-tyń Federaldy avıatsııa basqarmasy San-Dıegoda qulaǵan ushaqtyń Cessna 550 úlgisine jatatynyn habarlady, dep jazdy BBC.

Qazirgi ýaqytta zardap shekkender týraly naqty málimet joq, bortta kimderdiń bolǵany da belgisiz. Bul úlgidegi ushaq 6–8 adamdy tasymaldaı alady jáne kóbinese eki ushqyshpen jáne birneshe jolaýshymen bıznes-djet retinde paıdalanylady.

Ushaq qulaǵan sátte, jergilikti ýaqyt boıynsha tańerteń, aýa raıy tumandy bolǵan. Oqıǵa San-Dıego qalasyndaǵy Merfı-Kenıon aýdanynda oryn alǵan. Aldyn ala málimetter boıynsha, jerde 15 úı otqa oranǵan.

Bılik birneshe kvartaldyń turǵyndaryn shuǵyl evakýatsııalady. Jergilikti órt sóndirý qyzmeti basshysynyń orynbasary baspasóz máslıhatynda:

«Ol jerde bári reaktıvti otynmen lastanǵan», — dep málimdedi.

Onyń aıtýynsha, birneshe turǵyn úıge ushaq soqtyǵysyp, tikeleı zaqym kelgen.

San-Dıego polıtsııasy azamattarǵa bul aımaqqa barmaýǵa keńes berdi.

Eske sala keteıik, buǵan deıin AQSh-ta avıashoý kezinde ushaq qulaǵanyn jazǵan edik.