Bıznes qaýymdastyq zańdy tulǵalardyń qylmystyq jaýapkershiligin engizýge arnalǵan zań jobasyna qarsy
ASTANA. 1 naýryz. QazAqparat /Qanat Mámetqazyuly/ - Qazaqstannyń bıznes qaýymdastyǵy depýtattardan «QR keıbir zańnamalyq aktilerine zańdy tulǵalardyń qylmystyq jaýapkershiligin engizý máselesi boıynsha ózgerister men tolyqtyrýlar engizý týraly» zań jobasyn qabyldamaýdy suraıdy.
Bul týraly búgin QR Parlamenti Májilisinde atalǵan zań jobasy boıynsha ótken «dóńgelek ústel» barysynda málim boldy.
Esterińizge sala keteıik, atalmysh jıynnyń maqsaty zańdy tulǵalardy qylmystyq jaýapkershilikke tartý jónindegi tájirıbesin taldap, ony ulttyq zańnamaǵa engizý tustaryn zerdeleýge arnalǵan bolatyn. Alaıda elimizdiń bıznes qaýymdastyǵy osy zań jobasyna ózderiniń qarsylyǵyn bildirip otyr. «Biz osy qujattyń Májilistiń ekinshi oqylymynda qaıtarylatynyna senimdimiz. Sony depýtattardan ótinemiz. Ras, halyqaralyq tájirıbege salsaq, shet elderde bundaı tájirıbe barshylyq. Alaıda olardyń quqyqtyq júıesi de basqa ǵoı. Óıtkeni, sol memleketterde zańdy tulǵalardyń qylmystyq jaýapkershiligi bolmasa kinálilerdi jaýapqa tarta almaı qalatyn jáıtter kezdesedi. Al bizdiń zańnamamyz múldem basqa», - dedi «Atameken» odaǵy» UEP tóraǵasy Azat Perýashev.
Onyń paıymdaýynsha, Qazaqstannyń Qylmystyq-protsessýaldyq kodeksi zańdy tulǵalarǵa qylmystyq jaýapkershilikti engizbesten-aq olardyń jaýaptylyǵyn tolyq qamtamasyz ete alady. «Budan bólek, Qarjy polıtsııasy ázirlegen zań jobasynda memlekettik organdar men kommertsııalyq emes uıymdardyń zańdy tulǵalarynyń qylmystyq jaýapkershiligi qarastyrylmaǵan. Al jobanyń negizgi baǵyty kásipkerlik sýbektilerine arnalyp otyr. Onyń ishinde ashyq, ádil bıznes jasaıtyn kásipkerler de osy zań jobasyna únemi iligedi», - deıdi A. Perýashev.
