Bıznes-qaýymdastyǵy aldaǵy saılaýda N. Nazarbaevtyń kandıdatýrasyn qoldaıtyn bolady - «Atameken» odaǵy» UEP tóraǵasy
ASTANA. 14 aqpan. QazAqparat /Qanat Mámetqazyuly/ - Elimizdiń bıznes-qaýymdastyǵy aǵymdaǵy jylǵy 3 sáýirde ótetin kezekten tys Prezıdenttik saılaýda Elbasy Nursultan Nazarbaevtyń kandıdatýrasyna qoldaý bildiretin bolady.
Bul týraly búgin elordada ótken baspasóz máslıhatynda «Atameken» odaǵy» Ulttyq ekonomıkalyq palatasynyń tóraǵasy Azat Perýashev málim etti.
«Biz Nursultan Nazarbaevty - ekonomıkanyń naqty sektorlaryn, óndiristi tereń biletin, qatardaǵy qarapaıym qazaqstandyqtardyń, kásipkerlerdiń arman-muratyn túsinetin jáne oǵan árýaqytta qamqor bola alatyn adam dep sanaımyz. Sonymen qatar biz dál N. Nazarbaevtyń óz eline qyzmet etýi jalǵasa túsýi tıis dep sanaımyz. Ol zamanaýı dáýirimizdiń zańǵar tulǵasy. Sondyqtan da, Prezıdent densaýlyǵynyń arqasynda, ózinde sondaı múmkindikter týyp turǵan shaqta eline qyzmet etýi kerek», - dedi A. Perýashev.
Sonymen birge, UEP tóraǵasynyń aıtýynsha, búgingi máslıhat arqyly qoldaý bildirý bul úgit-nasıhat sharasy emes. «Degenmen «Atameken» odaǵy» aldaǵy prezıdenttik saılaý barysynda N. Nazarbaevtyń kandıdatýrasyn jalpy bıznes-qaýymdastyǵy tarapynan qoldap otyrǵandyǵyn qoǵamǵa bildirgisi keledi», - dedi A. Perýashev.
