Bıznes isine qol suǵý tótenshe jaǵdaı retinde qaralady - Bektenov
ASTANA. QazAqparat - Elimizde bıznestiń kez kelgen isine qol suǵý tótenshe jaǵdaı retinde qaralady. Bul týraly búgin Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov aıtty, dep habarlaıdy QazAqparat tilshisi.
«Kóbinese shaǵyn jáne orta bıznes qorǵanysty qajet etedi. Ókinishke qaraı bundaı kásipkerlerdiń arasynda qarapaıym quqyqtaryn bilmeıtin adamdar jıi kezdesip jatady. Memleket basshysynyń nusqaýymen, agenttik tóraǵasynyń buıryǵymen búginde bıznesti qorǵaý sybaılas jemqorlyqpen kúres vedomstvosy qyzmetiniń basty basymdyqtarynyń biri retinde aıqyndalǵanyna nazar aýdartqym keledi. Bıznestiń kez kelgen isine qol suǵýshylyq bizdiń tarapymyzdan tótenshe jaǵdaı retinde qaralatyn bolady jáne olarǵa qarsy áreketter de tótenshe júrgiziledi», - dedi ol «Atameken» UKP pen agenttik arasynda jasalǵan jol kartasyn iske asyrýdyń aralyq qorytyndysyna arnalǵan keńeste.
Onyń aıtýynsha, ákimshilik kedergilerdi joıý jáne bıznesti qorǵaý baǵytynda birshama jumys atqarylǵan. Máselen, memlekettik qyzmetterdi avtomattandyrý baǵytynda belsendi jumystar júrgizilýde.
«Búginde kórsetiletin memlekettik qyzmetterdiń 78 paıyzy sheneýnikterdiń qyzmet alýshymen aralasýynsyz, ıaǵnı elektrondy túrde nemese Halyqqa qyzmet kórsetý ortalyqtary arqyly júrgiziledi. Tsıfr tilimen aıtar bolsaq, 120 mln qyzmet sheneýnik pen azamat arasyndaǵy baılanyssyz kórsetiledi. Bul baǵyttaǵy ilgerileýshilik anyq baıqalady. Osydan 4 jyl buryn bul sany eki ese az edi. Demek, sheneýnikterdiń azamattar men kásipkerler úshin jasandy qıyndyqtar týyndatý múmkindigi eki ese joǵary bolatyn», - dedi Oljas Bektenov.
