Bıznes ıdeıalar forýmynda otbasy qundylyqtaryna arnalǵan portal tanystyryldy
ASTANA. QazAqparat - Astana qalasy boıynsha kásipkerler palatasy Іsker áıelder keńesiniń uıymdastyrýymen elordada «Bıznes ıdeıalar oazısi» atty ІІ bıznes ıdeıalar men isker áıelderdiń forýmy ótip jatyr. Forým barysynda qazaqtyń salt-dástúri men otbasy qundylyqtaryna arnalǵan jańa mýltımedııalyq «Otbasym.kz» portaly tanystyryldy, dep habarlaıdy QazAqparat.
«Otbasym» jýrnalynyń bas redaktory, oǵan qosymsha, búgin ashylǵan «Otbasym.kz» onlaıyn portalynyń jetekshisi, QR Prezıdenti janyndaǵy áıeldir isi jáne otbasy-demografııalyq saıasat jónindegi ulttyq komıssııanyń múshesi Sholpan Syzdyqovanyń aıtýynsha, mýltımedııalyq portal qazaqtyń salt-dástúrin, ádet-ǵurpyn, ulttyq kıimi men as-tamaǵyn dáripteıtin biregeı joba bolmaq.
«Otbasym.kz» degen ulttyq mýltımedııalyq poral búginnen bastap iske qosylady. Jalpy, «otbasym» jobasynyń tarıhy 2009 jyldyń 7 naýryzynan bastaldy. Sol kezde biz «Otbasym» atty jýrnal shyǵara bastaǵan edik. Keıin jýrnal oqyrmandary otbasy qundylyqtarynyń ortalyǵyn qurý týraly bastama kóterdi. Sóıtip, «Otbasym» atty qundylyqtar men tárbıe-ónegege arnalǵan ortalyq ashyldy. Ortalyqtyń basty mıssııasy - qazaqtyń kóne salt-dástúrin jandandyrý, umyt bolǵan qazaqtyń ulttyq taǵamdaryn zerttep, ony nasıhattaý, dástúrli kıim-keshekti kórsetip, halyqtyń kóz aldyna shyǵarý boldy. Al, mine, búgin sol ortalyqtyń taǵy bir «balasy» - «Otbasym.kz» atty mýltımedııaly portal dúnıege keldi»,-deıdi Sh.Syzdyqova.
Joba jetekshisiniń aıtýynsha, mýltımedııaly portal tipti ulttyq taǵamdardyń qazirgi zamanǵa saı retseptisin ázirlep shyqqan eken.
«Qazaqtyń ótkeni men búginin salystyratyn bolsaq, buryn qalaı edi, kóshpeli ómir saltyn ustanǵan ata-babamyz attan túspeıtin, únemi dene qozǵalysynda, jolda júrdi. Etimiz de, baýyrsaǵymyz da, jalpy, as-sýymyz sol alys saparlarǵa, sol kezdegi halyqtyń tynymsyz turmys-tirlishigine, kóshi-qonyna saı, kóp, qunarly bolyp pisiriletin. Al, qazir adamdardyń fızıkalyq qozǵalysy azaıdy, esesine, oılaý qabiletin damytý úshin qunarly dárýmender jetpeı jatady. Sondyqtan, bizdiń ulttyq taǵamdarymyzdyń qazirgi zamanǵa saı mólshermen daıyndaý tásilderin zerttep, ázirledik»,-deıdi Sh.Syzdyqova.
Bunymen qosa, portal otbasyndaǵy baqyt, otbasyndaǵy er men áıeldiń orny,bala tárbıesi, qyz balanyń tárbıesi sııaqty qazir ózektenip ketken baǵyttar boıynsha mol aqparat berýdi kózdep otyr eken.
«Táýelsizdik jyldarynda Qazaqstan ekonomıka men saıasatyn eshkimnen kem qylmaı, túzep aldy. Ol jaǵynan Qazaqstannyń myqty pozıtsııasy bar. Endi qazir memleket te, qoǵam da, otbasy qundylyqtaryna, otbasy saıasatyna nazar aýdaryp otyr. Ózimiz biletindeı, qazir egalıtarlyq otbasy, ıaǵnı, teń quqyly jubaılar otbasy sánge kirdi. Mine, «Otbasym.kz» onlaın portaly osyndaı ózekti taqyryptardy tarqatyp jazbaq», - dep túıindedi sózin Sh.Syzdyqova.
Al, bir jyl buryn Economist basylymy álem elderi arasynda ajyrasý sany boıynsha Qazaqstan alǵashqy on eldiń ishinen tabylǵanyn málim etken edi. Jýyrda ǵana, QR Bas Prokýrory Jaqyp Asanovtyń qatysýymen ótken alıment tóleý jónindegi jıyn barysynda, Qazaqstandaǵy árbir úshinshi jup ajyrasyp ketetini aıtylǵan bolatyn. Qazaqstanda 350 myń bala ákesinen alıment ala almaı júr.
