Bıznes ǵylymǵa múddelilik tanytpasa istiń bári bos- depýtat
ASTANA. QazAqparat - Ǵylymı zertteý nátıjelerin kommertsııalandyrý máselesi talqylanǵan forýmda QR Parlament Senatynyń depýtaty Baqytjan Jumaǵulov bul salany damytý úshin eń aldymen bıznes múddelik tanytýy tıis ekenin atap ótti, dep habarlaıdy «QazAqparat» HAA tilshisi.
Depýtattyń aıtýynsha, 2009 jyldyń 4 qyrkúıeginde QR Prezıdenti Nursultan Nazarbaev Qazaqstannyń barlyq ǵalymdarynyń basyn qosyp, ǵylym salasynyń jańa modelin qurýdy usynǵan. Arada 2 jyl ótkennen keıin kópten kútken «Ǵylym týraly» jańa zań qabyldanǵan. Al 2015 jyly 31 qazanda ǵylymı nátıjelerdi kommertsııalandyrý týraly zań shyqqan.
«Biz Búkilálemdik bankpen osydan 6-7 jyl buryn kommertsıalandyrý boıynsha baıqaý ótkizdik. Eń aldymen, 10 aǵa ǵylym qyzmetker men 10 kishi ǵylymı qyzmetkerdiń jumysy tańdaldy. Negizgi jumystyń júgin Búkilálemdik bank ózine alyp edi. Búgin, mine, osy baǵyttaǵy jumys jalǵasyp keledi. Ǵylymı Qor «Parasat» holdınginiń ishinde bolǵan. Biz 1,5 jyldyń ishinde ony holdıng quramynan alyp shyqtyq», - deıdi ol.
Baqytjan Jumaǵulov búgingi tańda ǵylymı jańalyqtardy kommertsııalandyrý baǵytynda QR BǴM jasap jatqan jumysqa oń baǵasyn berdi.
«Menińshe, eń basty másele - bıznestiń múddelik tanytýy. Ǵylymı zertteý nátıjelerine bıznes múddeli bolmaı, múmkindikterimizdiń bári bos. Biraq, meni vıtse-mınıstr Aslanbek Amrın búgingi tańda ekonomıkanyń naqty sektory ǵylymı zertteýlerdi kommertsıalandyrýǵa 4 mlrd teńge bólip otyrǵanyn aıtyp qýantyp tastady. Bul jaqsy nátıje. Demek, jyljý bar. Óz tarapymnan, qandaı zańnamalyq turǵyda kedergiler baryn bilip, kómektesýdi qalaımyz», - deıdi Baqytjan Jumaǵulov.
Eske sala ketsek, búgin Astanada «Ǵylym men bıznesti biriktirý quraly retinde tehnologııalardy kommertsıalızatsııalaý» forýmy bolyp ótti. Forýmǵa qatysýshylar ǵylymı jáne ǵylymı-tehnıkalyq qyzmet nátıjeleriniń damýyndaǵy ózekti máselelerdi talqylap, ǵylym men bıznestiń qarym-qatynasyn tájirıbe júzinde iske asyrý joldaryn qarastyrdy.
