Bıznes grantyn alýǵa ótinimder 1 sáýirden bastap arnaıy portalda qabyldanady
Ótinimderdi qabyldaý «Business.enbek.kz» portaly arqyly onlaın rejıminde júzege asyrylady. 2019 grant berý josparlanǵan, onyń 1089-y jastar úshin jáne 930-y halyqtyń áleýmettik osal toptary úshin.
Ótinimderdi qabyldaý 10 jumys kúnine sozylady, sodan keıin aýdandyq/qalalyq komıssııa berilgen ótinishterdi qaraıdy. Komıssııa otyrystarynda úmitkerler ózderiniń bıznes-jobalaryn tanystyratyn bolady. Ótinim berilgen kún komıssııanyń sheshimine áser etpeıdi.
Aǵymdaǵy jyly ótinimderdi qabyldaý 7 lek sheńberinde kezeń-kezeńimen júzege asyrylatyn bolady. Mundaı sheshim azamattardyń «Bastaý Bıznes» jobasy boıynsha oqýdan ótip úlgerýi úshin qabyldandy.
Granttar bir ret beriledi. Bul rette, bıznes-jobasyn komıssııa qaraý barysynda maquldamaǵan úmitker kelesi aǵyndardyń birine ótinimdi qaıta bere alady.
Bıyl barlyǵy 20 myń grant bólý josparlanýda. Sonyń ishinde jastar men halyqtyń áleýmettik osal toptarynan shyqqan adamdar úshin (ataýly áleýmettik kómek alýshylar; kópbalaly otbasy músheleri – kópbalaly otbasylar boıynsha járdemaqy alýshy jáne (nemese) onyń jubaıy (zaıyby); ońtústik óńirlerden soltústikke qonys aýdarýshylar; qandastar; múgedektigi bar balalardy tárbıelep otyrǵan otbasy músheleri; múgedektigi bar adamdar) 10 myń grant berý kózdelýde.
Nysanaly sanattarǵa sáıkes kelýden basqa, úmitkerler mynadaı krıterıılerdiń birine sáıkes kelýi tıis:
– halyqty jumyspen qamtý ortalyǵynda tirkelgen jumyssyz azamat;
– Qazaqstan Respýblıkasynyń salyq zańnamasyna sáıkes biryńǵaı jıyntyq tólemdi tóleýshi;
– ótinish bergen sátte mártebesin resimdeý merzimi 1 jylǵa deıingi jeke kásipker (onyń ishinde qyzmetin toqtatqan);
– jeke qosalqy sharýashylyqpen aınalysatyn tulǵa.
«Bastaý Bıznes» jobasy boıynsha kásipkerlik negizderine oqytýdy aıaqtaý týraly qoldanystaǵy sertıfıkattyń jáne oqytý barysynda daıyndalǵan bıznes-jospardyń bolýy mindetti bolyp tabylady.
Budan basqa, grant alýǵa úmitkerdiń turǵylyqty jeri boıynsha keminde 1 jyl turaqty nemese ýaqytsha tirkeýi bolýy tıis (qonys aýdarýshylar men qandastardy qospaǵanda).
Jumyspen qamtýǵa járdemdesý sharalarynyń qazirgi qatysýshylary, sondaı-aq 12 aı buryn jumyspen qamtýǵa járdemdesý sharalaryna qatysýdy óz erkimen, dálelsiz sebeppen toqtatqan adamdar grantqa úmitker bola almaıdy.
Ótinim berý úshin elektrondyq tsıfrlyq qoltańbany (budan ári – ETsQ) paıdalana otyryp, portalda tirkelý, ótinish nysanyn toltyrý jáne ETsQ kómegimen qol qoıý qajet.
Internetke nemese kompıýterge qoljetimdilik bolmaǵan jaǵdaıda, Halyqty jumyspen qamtý ortalyqtarynyń ózine-ózi qyzmet kórsetý aımaqtarynda, Halyqqa qyzmet kórsetý ortalyqtarynda, Kásipkerlerge qyzmet kórsetý ortalyqtarynda ótinim berýge bolady.
«Portaldy ótinimderdi qabyldaý boıynsha biryńǵaı tereze retinde paıdalaný memlekettik qoldaý sharalaryn kórsetý protsesinde úmitkerler men kórsetiletin qyzmetti berýshilerdiń fızıkalyq baılanystaryn azaıtýǵa ǵana emes, sondaı-aq irikteý jáne memlekettik qoldaý sharalaryn taǵaıyndaý týraly sheshim qabyldaý satylarynda adamı faktordyń áserin azaıtýǵa múmkindik beredi. Al kirýdiń biryńǵaı núktesi jáne jeke kabınettegi ótinimderdiń mártebesin qadaǵalaý múmkindigi azamattar úshin ashyqtyq pen qoljetimdilikti qamtamasyz etedi», – dedi QR Eńbekmıniniń Halyqty jumyspen qamtý departamentiniń dırektory Rýslan Tileýbaev.
Granttardy úmitkerlerdiń ótinishterin qaraý jónindegi komıssııanyń sheshimi negizinde halyqty jumyspen qamtý ortalyqtary beretin bolady. Komıssııa músheleri bıznes-jospardy kelesi krıterııler boıynsha baǵalaıdy:
– bıznes-ıdeıanyń básekege qabilettiligi;
– ótkizý naryqtarynyń pysyqtalýy;
– bıznes-jobanyń qarjylyq ómirsheńdigi;
– kásipkerlik daǵdylar deńgeıi;
– jańa jumys oryndaryn qurý.
Sheshim shyǵarylǵannan keıin portaldaǵy úmitkerdiń jeke kabınetine habarlama jiberiledi. Komıssııanyń oń sheshimi bolǵan jaǵdaıda úmitker tıisti habarlamany alǵan sátten bastap 3 jumys kúni ishinde portalda bank derektemeleri bar bank shotyn usynýy tıis.
Budan basqa, Portalda habarlama alǵan sátten bastap 3 jumys kúni ishinde grant alýshy Jeke kabınette ETsQ paıdalana otyryp, shartqa qol qoıýy tıis.
Kelesi aǵyndar boıynsha ótinim berý kúni aldyn ala Portalda, BAQ jáne áleýmettik jelilerde jarııalanatyn bolady.
Qosymsha aqparat alý úshin turǵylyqty jeri boıynsha jumyspen qamtý ortalyqtaryna júginýge bolady.