Bıznes emes, halyqtyń amandyǵy mańyzdy - sarapshy karantın jaıynda
«Bul qatań shekteý sharalaryn baıaǵyda qabyldaý qajet edi. Biz sál keshigip qaldyq. «Qazaqtyń qaýipsizdigi mańyzdy ma, álde shaǵyn jáne orta bıznes mańyzdy ma?» degen suraqty tarazylaıyqshy. Árıne, qazaq mańyzdy, halyq mańyzdy, ult mańyzdy. Erteń halyq qyrylyp qalsa, shaǵyn jáne orta bıznestiń ne keregi bar? 15 kún, 1 aı bolsa da, oǵan kez kelgen adam shydaıdy dep oılaımyn. Asyra silteýdiń qajeti joq. «Bir jylǵa qoıannyń terisi de shydaıdy» degendeı, bir aı eshteńe etpeıdi. Osy bir aı boıy tártipke boısunyp, shekteý sharalaryn qatań ustanyp júrsek, onda vırýstyń órshýi basylady degenge úmit bar. Sol sebepti bul shekteý sharalary asa qajet. Biraq, meniń jeke pikirimshe, bul shekteý sharalaryn tezirek qolǵa alý kerek», - dedi Samat Nurtaza.
Esterińizge sala keteıik, keshe QR Premer-Mınıstri Asqar Mamınniń tóraǵalyǵymen ótken Memlekettik komıssııa otyrysynda Qazaqstanda epıdemıologııalyq ahýaldyń órshýin jáne koronavırýs ınfektsııasymen syrqattanýshylyqtyń ósýin eskere otyryp, bıylǵy 5 shildeden bastap 14 kúnge birqatar shekteý sharalaryn engizý týraly sheshim qabyldanǵan edi.
