Bıznes bastaǵysy kelgen elordalyqtarǵa qaıtarymsyz granttar berildi
NUR-SULTAN. QazAqparat - Bıyl Halyqty jumyspen qamtý ortalyǵyna shaǵyn nesıeleý boıynsha keńes alýǵa 65 adam ótinish bildirgen. Bul týraly elorda turǵyndaryn jumyspen qamtý máselesi taqyrybynda ótken onlaın baspasóz konferentsııasynda aıtyldy, dep habarlaıdy QazAqparat tilshisi.
«Bıyl Halyqty jumyspen qamtý ortalyǵyna shaǵyn nesıeleý boıynsha keńes alýǵa 65 adam ótinish bildirgen. Onyń ishinde 39 ótinish berýshige túsinikteme berilip, 26-sy boıynsha ekinshi deńgeıli bankterge shaǵyn nesıe berýge joldama berildi. Kásiptik oqytý jumys berýshiler málimdegen biliktilikter men daǵdylar boıynsha júzege asyrylady. Qysqa merzimdi kásiptik oqytý toptardyń jınaqtalýyna qaraı júzege asyrylady. Qysqa merzimdi kásiptik oqytýdyń uzaqtyǵy biliktilik erekshelikteri men daǵdylaryna baılanysty 6 aıdan aspaıdy. Búgingi tańda 17 mamandyq bekitildi, olar: aspaz, naýbaıshy, kondıter, tiginshi, tiginshi-sheber, shashtaraz sheberi, baqylaýshy kassır, anımatsııa jáne vıdeografıka, tárbıeshiniń kómekshisi, jıhaz jınaýshy, aǵash syrlaý tsehynyń sheberi, armatýrshy, montajshy, gaz jabdyǵyn paıdalaný jáne jóndeý slesari, gaz elektr dánekerleýshi, elektroslesar, jartylaı avtomatty mashınada elektr dánekerleýshi», - deıdi «Nur-Sultan qalasy ákimdiginiń Halyqty jumyspen qamtý ortalyǵy» KMM jumysqa ornalasýǵa járdemdesý bóliminiń jetekshisi Azamat Baıtasov.
Onyń aıtýynsha, bıznes-ıdeıalardy iske asyrýǵa arnalǵan memlekettik granttar óz isin ashýdy josparlap otyrǵan baǵdarlamaǵa qatysýshylarǵa tegin jáne qaıtarymsyz negizde 200 AEK-ke deıingi mólsherde beriledi.
«Qatysýshylar – «Eńbek» baǵdarlamasy aıasynda qysqa merzimdi kásiptik oqýdy aıaqtaǵan jumyssyzdar, kásipkerler men «Bastaý Bıznes» jobasy boıynsha kásipkerlik negizderine oqytý kýrsynan ótken, QR Salyq zańnamasyna sáıkes biryńǵaı jıyntyq tólemdi tólegen tulǵalar. Grant alý úshin Halyqty jumyspen qamtý ortalyǵyna baryp, keńes alyp, barlyq qajetti qujattarmen birge ótinish berý qajet. Jyl basynan beri 300-den astam azamat grantqa qujat tapsyryp, 64 azamat grantqa ıe boldy», - deıdi ol.
