Bıznes ashý úshin beriletin memlekettik grantty kimder ala alady

NUR-SULTAN. QazAqparat – Elorda ákimdiginde ótken brıfıng barysynda mamandar bıznes ıdeıalardy iske asyrýǵa arnalǵan grant kimderge beriletinin aıtty, dep dep habarlaıdy QazAqparat tilshisi.

«Jańa bıznes ıdeıalardy iske asyrýǵa grant alý úshin qatysýshy business.enbek kásipkerlik bastamalardy qoldaý portaly arqyly ótinish bere alady. Grant usynylatyn adamnan «Bastaý Bıznes» jobasy boıynsha oqyǵanyn aıǵaqtaıtyn sertıfıkat, úmitkerdiń portalda belgilengen talaptarǵa sáıkestigin rastaıtyn nátıjeleri jáne komıssııanyń oń sheshiminiń bolýy talap etiledi», - dedi Nur-Sultan qalasy halyqty jumyspen qamtý ortalyǵynyń kásipkerlik bastamalardy qoldaý bólimi basshysynyń mindetin atqarýshy Baqyt Bekenov.

Quzyrly organ aqparatyna sáıkes, jobaǵa myna sanattaǵy azamattar qatysa alady:

• 29 jasqa deıingi jastar;

• Áleýmettik az qamtylǵan otbasy músheleri, ıaǵnı ataýly áleýmettik kómek alýshylar;

• Kópbalaly otbasy jaǵdaıy boıynsha járdemaqy alýshylar;

• Qandastar men qonys aýdarýshylar;

• Múgedek bala tárbıelep otyrǵan tulǵalar;

• Eńbekke qabiletti múgedektigi bar adamdar;

• Asyraýshysynan aıyrylǵanyna baılanysty áleýmettik járdemaqy alýshylar.

Eske sala ketsek, buǵan deıin kásip ashý úshin azamattarǵa beriletin memlekettik grant somasy ulǵaıǵanyn habarlap edik.