Bıznes ashý úshin aýyl turǵyndaryna 50 myń shaǵyn nesıe beriledi

NUR-SULTAN. QazAqparat - Aýyl sharýashylyǵy mınıstrligi AÓK nesıelendirý múmkindikterin keńeıtýdi josparlap otyr. Bul týraly Ortalyq kommýnıkatsııalar qyzmetinde ótken brıfıngte aıtyldy, dep habarlaıdy QazAqparat tilshisi.

«Koronavırýs pandemııasyna qaramastan respýblıkanyń agroónerkásip kesheni 2020 jyly barlyq makrokórsetkishter boıynsha ósim dınamıkasyn kórsetti. Aýyl sharýashylyǵynyń jalpy ónim kólemi 5,6%-ǵa artyp, 6,3 trln teńgeni qurady. Bul Eýrazııalyq ekonomıkalyq odaq elderi arasyndaǵy eń joǵary ósim kórsetkishi», - deıdi dedi Aýyl sharýashylyǵy mınıstrligi strategııalyq josparlaý jáne taldaý departamentiniń basshysy Sáýle Moldabaeva.

Onyń aıtýynsha, aldaǵy ýaqytta bul ósimdi odan ári kóterý úshin mınıstrliktiń aldyna AÓK-degi eńbek ónimdiligin 2,5 ese arttyrý, óńdelgen ónim eksportyn 2 ese ulǵaıtý, ishki naryqty 80%-dan astam deńgeıde azyq-túlik taýarlarymen tolyqtyrý jáne 1 mln aýyl turǵynynyń tabysyn turaqty túrde kóterý mindetteri qoıylǵan.

«Osy mindetterge sáıkes, mınıstrlik agroónerkásip keshenin memlekettik qoldaý tıimdiligin jaqsartý jumysyn júrgizip otyr. Aýyl kásipkerlerine shaǵyn nesıe berý jalǵasady. 2020 jyly aýyl kásipkerlerin qarjylandyrýǵa jalpy somasy 43,2 mlrd teńge bolatyn 11 myńnan astam shaǵyn nesıe berildi. Bul qarjynyń 60%-yn isin jańadan bastaǵan kásipkerler aldy. Jalpy, shaǵyn nesıelendirý baǵdarlamasy bir jyl ishinde aýyldarda 11 myń turaqty jumys ornyn qurýǵa múmkindik berdi. Aldaǵy 5 jylda jalpy somasy 250 mlrd teńge bolatyn taǵy 50 myń shaǵyn nesıe berý josparlanyp otyr», - deıdi ol.