Bizge jumsalǵan qarajattyń tıimdi qaıtarymy qajet – Álıhan Smaılov

NUR-SULTAN. QazAqparat – Búgin Úkimet otyrysynda tehnologııalyq serpilis ulttyq jobasyn talqylaý kezinde Premer-Mınıstr Álıhan Smaılov kemshilikter anyqtalǵan jobalardy aıtty, dep habarlaıdy QazAqparat tilshisi.

«Biz «zertteý júrgizý kerek dep», ǵylymı zertteý jumystaryn kóbeıte bermeýimiz kerek. Eń aldymen, olardyń nátıjeliligi men ekonomıkanyń túrli sektorlarynda qoldanylýyn arttyrý – mańyzdy mindet. Sońǵy jyldary ǵylym týraly zańnamaǵa birshama ózgeris engizildi jáne ony qarjylandyrý 2 esege jýyq ósti. Bizge jumsalǵan qarajattyń tıimdi qaıtarymy qajet», - dedi Á. Smaıylov.

Osy oraıda ol otandyq ındýstrııa, ǵylymı qoǵamdastyq, ýnıversıtetter men bıznes barynsha ózara tyǵyz baılanys ornatýy qajet ekenin tapsyrdy.

«Ǵylymı jetistikter óndiriske engizilip, halyqqa naqty paıda ákelýi tıis. Ǵylym mınıstrligi buǵan erekshe nazar aýdarýy kerek. Birqatar baǵyttar boıynsha buryn belgilengen josparlar men keıbir kórsetkishterdiń oryndalmaı qalǵanyn atap ótý kerek. Patsıentterdiń densaýlyq jaǵdaıyn úzdiksiz baqylaý jáne proaktıvti medıtsınalyq qyzmet kórsetý úshin eHealth biryńǵaı ekojúıesin ázirleý jumystary ýaqtyly júrgizilgen joq», - dedi Úkimet basshysy.

Sonymen qatar Premer-Mınıstr «Tsıfrlyq agrokásiporyn» jáne «Tsıfrlyq karer» jobalaryn iske asyrý barysynda da kemshilikter anyqtalǵanyn aıtty.

«Bul saıyp kelgende, osy jobalardyń sapasyna áser etýi múmkin. Jer men jyljymaıtyn múliktiń memlekettik kadastryn avtomattandyrý jáne ortalyqtandyrý rásimi aıaqtalǵan joq», - dedi Álıhan Smaılov.

Foto: t.me/KZgovernment