Bizge ultjandylyq kerek - Asqar Bopyldyqov
ATYRAÝ. QazAqparat - Bıyl el Táýelsizdigine týra 25 jyl tolady. Osynaý baǵa jetpes baılyq bizge ońaılyqpen kelgen joq. Eldik pen erkindik tarazyǵa tartylǵan talaı tar jol, taıǵaq keshýdi bastan ótkergen ata-baba erligi - urpaqqa úlgi, óshpes ónege. Al, búgingi jastar ony qanshalyqty sezinip otyr?
Osyǵan oraı «Nur Otan» partııasy «Jas Otan» jastar qanaty oblystyq fılıalynyń atqarýshy hatshysy Asqar Bopyldyqovtyń oıyn bilgen edik. - Aramyzda «ultjandylyq» degen sózdi basqa uǵymdarmen shatastyryp, shyn mánin tereń túsine bermeıtin jastar bar. Al, shyn máninde onyń tórkini «táýelsizdik» degen kıeli qundylyqtan týyndaıdy. Egemen eldiń urpaǵy ultyn jan-tánimen súıse ǵana, babalar ańsaǵan erkindik saqtalady. Uly Otan soǵysy jyldarynda maıdan dalasynda qarsha boraǵan oq pen laýlaǵan ottyń ortasynda júrip, Otanyn qorǵap qalǵan erler esimin biz umytpaýymyz kerek. Sebebi, olardyń erligi jastarǵa patrıottyq tárbıe berýge eń yqpaldy mysal bola alady, dep habarlady «Atyraý» gazeti.
Kúndelikti kórip júrgenimizdeı, qazir qoǵamda minberge shyǵyp kósile sóıleıtin nemese ǵalamtor jelisinde nebir ádemi pikirler qaldyratyndar kóp. Biraq, óz eliniń naǵyz patrıoty bolý - ádemi áńgime aıtyp, jalań urandaý nemese ortalyq alańda ádettegideı fleshmob ótkizý emes. Syndarly sóz naqty ispen bekemdelýi kerek. Ózgeni sońynan ertý úshin árkim ózi alda bolýy shart. Sonda ǵana sharalardyń qaıtarymy bolady. Demek, memleketimizdiń úzdiksiz damýyna, onyń odan ári órkendeýine ár jas naqty isimen úles qosýy tıis. Ras, jurtty jigerlendirip, ortaq maqsatqa jumyldyra biletin jastar jeterlik. Alaıda, jastar otbasynda ózderin qalaı ustaıdy? Árıne, kópke topyraq shashýdan aýlaqpyn, biraq, keıbir jastar ata-anasyn syılaýdan da qalyp bara jatqanyn kózben kórip júrmiz. Osyndaı jaǵdaıda olardyń boıyna qazaqstandyq patrıotızmdi qalaı sińiremiz?
«Otan otbasynan bastalady» desek, tárbıelik sharalarda alǵa qoıǵan basty maqsatymyzdyń biri de osy bolmaq. Áleýmettik jelidegi júıesizdik te kóńil qynjyltady. Qyz balanyń abyroıyn aırandaı tógetin kórinisti, bir-birimen tóbelesti ǵalamtorǵa basqa ult emes, ózimizdiń qazaq jigitteri shyǵaratynyn bilgende ishiń ýdaı ashıdy.
Olar kóshede ketip bara jatyp, súrinip ketken bireýdi kórip qalsa boldy, áleýmettik jelige salýǵa qumar. Onymen ne utady? Kimdi mazaq etip otyr? Mine, osyndaı júgensizdikke tosqaýyl qoıý qajet. Osynyń bári tárbıeniń, kóp rette ata-ana tárbıesiniń jetpeı jatqanyn kórsetedi. Ata-baba bastan keshken zobalańdy kórmeı ósken qazirgi ul-qyz - baqytty urpaq. Olar ne jeımin, ne kıemin dep bas qatyrmaıdy. Erinbeı eńbek etken jannyń oılaǵany oryndalýda. Sapaly bilim alýyna, jemisti bıznespen shuǵyldanýyna múmkindik mol. Mine, osyndaı ıgilikter úshin olar Táýelsizdikke táý etip, aldyńǵy býyn aǵa-apalarǵa sheksiz qaryzdar ekenin umytpaýy kerek. Bizdiń mindetimiz - solardyń sanasyna osy qundylyqtardy sińirý. Bul baǵytta júrgizilip jatqan júıeli jumystardy «jasotandyqtar» aldaǵy ýaqytta da odan ári jalǵastyra beretin bolady.
