Bizge shetelden kıber-shabýyl jasaldy - Bilim mınıstrligi
ASTANA. QazAqparat - Ortalyq kommýnıkatsııalar qyzmetine kelip, jýrnalısterdiń suraǵyna jaýap bergen Bilim jəne ǵylym vıtse-mınıstri Elmıra Sýhbanberdıeva vedomstvonyń saıtyna shetelden DDOS shabýyly jasalǵanyn məlim etti, dep habarlaıdy QazAqparat.
«Ótken senbiden jeksenbige qaraǵan túni Bilim jəne ǵylym mınıstrliginiń saıtyna DDOS shabýyly jasaldy. Saıt jumysy kelesi kúni qalpyna keltirildi. Aldyn ala məlimet boıynsha, shabýyl sheteldik serverden jasalǵan. Osy kıbershabýyl aqparat quraldary men jelilerde jalǵan aqparat taratýmen qatar kelip otyr. Bul - bilim jəne ǵylym salalaryn damytý baǵdarlamasynyń bedelin túsirýge baǵyttalǵan qadam», - deıdi vıtse-mınıstr.
Qazir mınıstrlik quzyretti organdarǵa sharalar qoldaný úshin júgingen. Al, vıtse-mınıstrdiń aıtyp otyrǵan jalǵan aqparaty - «2009 jyly qabyldanǵan mamandyqtar klassıfıkatory ózgerdi» degen aqparat.
«Bilim jáne ǵylym mınıstrligi Prezıdenttiń tapsyrmalaryn iske asyrý úshin qajetti sharalardy qolǵa alyp jatyr. Alaıda sońǵy kúnderi aqparat quraldarynda, áleýmettik jelilerde jalǵan aqparat taratý jáne arandatý faktileri bolǵanyn bilesizder. Bul bilim jáne ǵylym salalaryn damytý baǵdarlamasynyń bedelin túsirýge baǵyttalǵan qadam. Mınıstr óz pikirin aıtyp, jarııalaǵanyn bilesizder. 2009 jyly qabyldanǵan mamandyqtar klassıfıkatory ózgergen joq. Qazaq tili men ádebıeti, tarıh, lıngvıstıka, shyǵystaný mamandyqtary da óz ornynda. Eshteńe ózgergen joq, ózgermeıdi de. Bolashaqta jańa klassıfıkator daıyndalǵan jaǵdaıda da atalǵan mamandyqtardyń orny saqtalatyny týraly resmı túrde málimdegim keledi», - dedi vıtse-mınıstr.
