Bizge shala-sharpy jumystyń keregi joq - Álıhan Smaıylov

ASTANA. QazAqparat - Premer-Mınıstr Álıhan Smaıylov Shymkent qalasyn damytýdyń ózekti máseleleri jáne osy jyldyń 27 qańtarynda megapolıske jumys sapary aıasynda berilgen tapsyrmalardyń oryndalý barysy jóninde keńes ótkizdi, dep habarlaıdy QazAqparat.

Ortalyq memlekettik organdar men qala ákimdiginiń basshylary qatysqan keńeste:

turǵyn úı, avtojol, «Juldyz», «Bozaryq» jáne «Tassaı» ındýstrııalyq aımaqtarynyń ınjenerlik ınfraqurylymyn salý;

«Saıram» eldi mekeninde jylytý júıeleri men sorǵy stansalaryn rekonstrýktsııalaý;

qazandyqtardy jańǵyrtý;

sýmen jabdyqtaý nysandaryn jáne Almaty tas joly boıyndaǵy «Turan» magıstraldyq káriz kollektoryn salý boıynsha sharalar qaraldy.

Sonymen qatar ońtústik óńirlik hab qurý sheńberinde saýda-logıstıkalyq ortalyqty keńeıtý jáne MÓZ aınalasynda munaı shıkizatyn tereń óńdeıtin jańa ónerkásiptik kásiporyndardy iske qosý máseleleri talqylandy.

Premer-Mınıstr Energetıka mınıstrligine Shymkent munaı óńdeý zaýytynyń qýattylyǵyn buryn josparlanǵandaı jylyna 9 mln tonna emes, qazirgi 6 mln tonnadan 12 mln tonnaǵa deıin arttyrý tásilderin qaıta qaraý qajettigin atap ótti. Sondaı-aq bul jumysty jańadan salynatyn qaıta óńdeý kásiporyndarynyń qurylysymen qatar júrgizý kerek.

«Bizge shala-sharpy jumystyń keregi joq. Bul jobaǵa qomaqty qarjy quıylady, sondyqtan qýattylyqty jylyna 6 mln tonnaǵa dereý arttyrý qajet. JJM-ge degen suranys jyldan jylǵa artyp keledi. Ekonomıka ósýde, halyq sany kóbeıip, kásiporyndar ózderiniń aınalymyn arttyrýda. Bul protsesterdiń bárin, onyń ishinde JJM óndirisin ulǵaıtý arqyly qoldaý qajet», — dedi Álıhan Smaıylov.