Bizge revolıýtsııa emes, evolıýtsııa kerek - N.Nazarbaev
ASTANA. 25 sáýir. QazAqparat - Bizge revolıýtsııa emes, evolıýtsııa kerek. Biz Keńes Odaǵy kezinde-aq túrli revolıýtsııalardyń zardabyn tarttyq. Endi azamattardyń ál-aýqatyn arttyrý, áleýmettik baǵytty damytý, bilim berý isin jetildirip, densaýlyq saqtaý salasyn damytý, azamattardy baspanamen qamtamasyz etý sııaqty máseleler birinshi orynǵa shyǵý kerek,
dedi búgin Qazaqstan Prezıdenti Nursultan Nazarbaev Reseıdiń «Reseı-24» telearnasyna bergen suhbatynda.
«Egıpet týrızm salasy arqyly jylyna 14 mıllıard AQSh dollary kóleminde paıda taýyp kelipti. Al ótken jyly olar 3 mıllıard dollardan az paıda tapty. ıAǵnı Egıpet bir jyl ishinde 11 mıllıard dollardan qaǵyldy. Túptep kelgende, bunyń barlyǵy halyqtyń ál-aýqatymen tikeleı baılanysty dúnıeler bolatyn», -dedi Elbasy.
Memleket basshysynyń pikirinshe, búginde Lıvııa elinde bılik joq. Al Lıvııa, Týnıs, Egıpet sııaqty elderde saılaýlar ótkennen keıin bılik basyna kimder keledi, ol jaǵy belgisiz. Bizge túsiniktisi Islam memleketteri Shárıǵatqa basymdyq beredi. «Osy rette biz túrli revolıýtsııalardan ne paıda taptyq degen saýal týyndaıdy. Bizge qazir revolıýtsııa emes, evolıýtsııa kerek», - dep atap kórsetti N.Nazarbaev.
Sondaı-aq Elbasy sózinde qazir bizge tónip turǵan naqty qandaı da bir qaýip-qaterdiń joqtyǵyn, alaıda ol týyndaı qalsa birinshi kezekte ońtústikten bolýy yqtımaldyǵyn atap ótti. «Óıtkeni esirtki men esirtki aǵyny úlken qaýip. Aýǵanstan jyl saıyn esirtki zattaryn óndirý isin keńeıtip otyr. Al ujymdyq kúshter Aýǵanstannan ketetin bolsa, bul elde qandaı bılik ornap, onyń qandaı saıasat júrgizetindigi belgisiz. Sondaı-aq Iran, Izraıl sııaqty elderdiń bir-birine qarsy turý áreketteri nemen aıaqtalýy múmkindigin de biz bilmeımiz. Jalpy Taıaý Shyǵystaǵy jaǵdaı bolashaqta qandaı bolady? Bunyń barlyǵy bizge beımálim», - dedi Prezıdent.
