Bizge óte kúshti dopıngtik uıym kerek - Búkilálemdik dopıngke qarsy agenttik departamentiniń dırektory
ALMATY. 28 qazan. QazAqparat - Búkilálemdik dopıngke qarsy agenttik (WADA) sporttaǵy tazalyqty qamtamasyz etý úshin barlyq uıymdarmen jumys jasaıdy.
Bul jaıly keshe Almatyda ótip jatqan Ortalyq Azııalyq aımaqtyq dopıngke qarsy uıymnyń (RADOCA) konferentsııasynda aıtyldy.
"Bizge óte kúshti dopıngtik uıym kerek. Qazaqstanda ulttyq dopıngtik uıymdy damytýǵa úlken qoldaý jasalýda. Jalpy sportta dopıng qaýpi óte joǵary. Syıaqy kóleminiń ósýine oraı sportshylar keıde tabysqa tezirek qol jetkizý úshin baryp jatady. Biz ony toqtatýymyz kerek", - deıdi Búkiálemdik dopıngke qarsy uıymnyń Bilim jáne damý baǵdarlamalary departamentiniń dırektory Rob Keler. Onyń aıtýynsha, Londondaǵy HHH jazǵy Olımpıada oıyndarynda dopıngtik daýlardyń az bolýyna atletterge oǵan deıin júrgizilgen testileý óz septigin tıgizgen. Qazir velosport qaýymdastyǵy sportty tazartý úshin kóp jumystar jasaýda. Oǵan áıgili veloshabandoz Armstrongke qatysty jáıtter aıqyn dálel bola alady. Jalpy Búkilálemdik dopıngke qarsy uıymnyń kodeksin qabyldaǵan sportshylar ony buzǵan jaǵdaıda barlyq ataq-dárejesinen aıyrylyp, aıyppul tóleıdi. Bul ózgelerge sabaq bolyp, olardyń dopıng qabyldaý táýekelin azaıtýǵa úlken septigin tıgizedi.
