Bizge orys tili de, aǵylshyn tili de kerek – Májilis tóraǵasy
«Áriptesińiz Rınat Zaıytov «Qazaqstanda orys tili ádebıetiniń saǵatyn qysqartý kerek. Nege bizdiń balalar tek orys ádebıetin oqýy kerek?» degen edi. Qazir Qazaqstandaǵy mektepterde orys tili pániniń saǵattaryn qysqartý kerek pe?», - dep surady tilshiler Májilis kýlýarynda.
Erlan Qoshanov Májiliste alýan túrli pikiri bar depýtattar jınalǵanyn, ár depýtat óz pikirin aıtýǵa quqyly ekenin jetkizdi.
«Eń aldymen bizge orys tiline tyıym salý kerek pe, álde memlekettik tildi damytý kerek pe? Bul týraly buryn da pikirimdi aıtqamyn. Sondyqtan biz, bizdiń balalarymyz, urpaǵymyz neǵurlym kóp til bilsek, soǵurlym basqa elderdiń turǵyndarynan bir deńgeı bıik turamyz»,-dedi spıker.
Májilis spıkeri sondaı-aq orys tili de, aǵylshyn tili de kerek, alaıda birinshi kezekte basymdyq memlekettik tilde bolýy kerek ekenin jetkizdi.
«Sondyqtan mektep bitirgen balalarymyz memleketti tildi erkin meńgerip shyǵýy kerek. Másele sonda emes pe? Munda basqa tilderdi oqytýǵa kedergi joq. Biz basqa tilderdi oqytýdy tómendetý arqyly memlekettik tildiń máselesin sheshpeýimiz kerek. Bárin de damytý kerek, biraq memlekettik tilge basymdyqty saqtaý kerek», - dedi ol.
Buǵan deıin Erlan Qoshanov mektepke hıdjabpen barý daýyna qatysty pikir bildirip, mektepti dinı aǵymdar ordasyna aınaldyrmaý týraly aıtqan edi.
