Bizge qýatty da ál-aýqatty Qazaqstandy eshkim quryp bermeıdi – Nurtóre Júsip
«Jaǵdaı kún saıyn ózgerip jatqan ýaqyt. Sol ýaqyt búkil qazaq qoǵamynan jańarýdy, tazarýdy, barynsha bekem ult bolýdy talap etip otyr. Qazaqtyń basyna talaı syn-saǵat, qaýip pen qater tóngen. Memleket basshysy «Biz osyndaı yntymaqtyń arqasynda qańtardaǵy qıyn-qystaý kúnderde memlekettigimiz ben tutastyǵymyzdy qorǵap qaldyq»,-dedi. Túsingen adamǵa tereń sóz. «Qazir búkil álemdegi ahýal ózgerip jatyr. Jańa qundylyqtarmen qatar kúrdeli syn-qaterler paıda bolýda. Osyndaı aýmaly-tókpeli ýaqytta elimiz damýdyń kelesi kezeńine qadam basty. Biz «Jańa Qazaqstandy» qurýǵa kiristik. Bul – óte aýqymdy mindet. Tipti, bolashaqtaǵy taǵdyrymyzdy sheshetin asa mańyzdy jumys deýge bolady», - degen Qasym-Jomart Toqaevtyń sózi bárimizge naqty baǵdar», - dedi senator.
Osy rette Nurtóre Júsip Prezıdent eldegi jetekshi saıası uıymdy jańǵyrtý týraly aıtqanda qazaqtyń «Uıytqy» degen ádemi sózin qoldanǵanyna nazar aýdartady.
«Shyn máninde barlyq is-áreketke uıytqy bolar kúsh kerek. Jańadan velosıped oılap tabýdyń qajeti shamaly. Qoldaǵy bardy uqsatý qajet. Ózgeristi eń aldymen ózimizden bastaıyq degen Prezıdent partııanyń aty zatyna saı bolsyn degen tilek bildirdi. Májilis Tóraǵasy Erlan Qoshanov saıası uıymnyń ataýyn Amanat dep ózgertýdi usyndy. Amanat degen sóz qazaq úshin qasıetti. «Egemendigimiz, eldigimiz ben birligimiz, keń baıtaq jerimiz – bizge babalardan jetken amanat. Osy qasterli qundylyqtarymyzdy kózdiń qarashyǵyndaı saqtap, bolashaqqa mıras etýimiz kerek. Memlekettilik dástúr jalǵastyǵy, urpaq sabaqtastyǵy degenimiz – mine osy. Halqymyz eshqashan amanatqa qııanat jasamaǵan», - dep Qasym-Jomart Kemeluly atalǵan usynysty qoldady», - dedi ol.
Senator partııanyń ataýy ózgergenin, endi onyń qurylymy da, sapalyq ólshemi de ózgerýi tıis ekendigin basa aıtady.
«Mańdaıshany aýystyrǵannan eshkimniń mańdaıy jarqyraı qoımaıdy. Mazmundy is-áreket, partııalyq apparattyń ýaqytqa ıkemdelýi, «janarynda oty bar» jandardyń jarqyrap shyǵýy, elmen etene jumys isteý amaldaryn tabý kerek-aq. Eń bastysy – halyqtyń senimine ıe bolý mindeti alda tur. Bul úshin Májilis pen máslıhattaǵy partııa fraktsııalary naqty sheshimder qabyldaýǵa kóshýi qajet. Partııa jas saıasatkerlerdi shyńdaıtyn, suryptaıtyn uıymǵa aınalýy kerek. Qazir áleýmettik jelide jelpine sóılep, máseleniń kóbin jadaǵaı talqylaý kóp. Prezıdent jurtty alańda nemese jelide jelkildegennen góri Parlament pen máslıhat jıyndarynda syndarly jumys isteýge shaqyrdy. Sóıtip saıası mádenıetti qalyptastyrýdyń jolyn kórsetti», - dedi ol.
Senat depýtaty Memleket basshysy 16 naýryzda saıası reformalardyń jańa baǵdarlamasyn usynatynyn habarlaǵandyǵyn atap ótti.
«Men úshin eń basty qundylyq – Qazaqstannyń Táýelsizdigi. Memleket basshysy retinde elimizdiń qaýipsizdigi men halqymyzdyń amandyǵyn qamtamasyz etý úshin qoldan kelgenniń bárin jasaımyn. Jaýapkershilik júgi qanshama aýyr bolsa da, odan esh qaımyqpaımyn», - degen Toqaevtyń sózinen bastalǵan reformalardyń barlyǵy júıel túrde jalǵasatynyn ańǵarýǵa bolady. Jón sózge toqtaǵan jurtpyz. Ulaǵatty tárbıe kórgen ultpyz. Bir nárseni anyq uǵynǵan abzal. Bizge qýatty da ál-aýqatty Qazaqstandy eshkim quryp bermeıdi. Bárin ózimiz isteýimiz qajet. Osyny qaperde ustaıyqshy», - dedi Nurtóre Júsip.
