Bizge qoǵamdyq tártipti, qoǵamdyq oryndardaǵy adamdardyń is-áreketterin retteıtin qarapaıym ári túsinikti zań kerek - Elbasy
ASTANA. 3 tamyz. QazAqparat - Bizge qoǵamdyq tártipti, qoǵamdyq oryndardaǵy adamdardyń is-áreketterin retteıtin qarapaıym ári túsinikti zań kerek.
Bul týraly búgin QR Parlamentiniń besinshi shaqyrylymynyń ekinshi sessııasynyń ashylýy barysynda sóz sóılegen Memleket basshysy Nursultan Nazarbaev osylaı dedi.
Taıaýda ǵana búkil elimizdegi jalǵyz metronyń Almaty qalasynda ashylǵandyǵyn aıta kele Memleket basshysy: «Qazirdiń ózinde keıbir vagondardaǵy oryndyqtar búlingen, boıaýmen jazylǵan jazýlar bar. bul balalyq ne bolmasa kishigirim buzaqylyq emes, memleket múlkine jasalǵan qylmys», - dedi.
Osy oraıda Elbasy kinálilerdi jazaǵa tartý quqyq buzylǵan jerde ótýi kerektigin atap ótti. «Kireberiste qoqys qaldyrsa, sot oryndaýshysynyń baqylaýmen bir aı baspaldaqty tazalap jý. Saıabaqtaǵy shamdy syndyrsań, shyǵynyn óteýmen qatar, máselen 2 apta boıy alleıany tazalap, sypyr. Ózderińiz de jaqsy bilesizder, máselen, Amerıkada kınojuldyzdar da, belgili saıasatkerler de kishigirim buzaqylyǵy úshin zańdy jaza retinde kóshe sypyrady. Bizge qoǵamdyq tártipti, qoǵamdyq oryndardaǵy adamdardyń is-áreketterin retteıtin qarapaıym ári túsinikti zań kerek», - dedi QR Prezıdenti.
Bul rette Memleket basshysy Parlament depýtattaryn dál osyndaı zań qabyldaý bastamasyn kóterýge shaqyrdy.
