Bizge qazaqtaný, talanttaný, tulǵataný baǵytynda áli kóp jumystar atqarý qajet - Alash arystarynyń ǵylymı-pedagogıkalyq murasyn zertteý ortalyǵynyń dırektory
;ALMATY. Qarashanyń 14-i. QazAqparat /Erlik Erjanuly/ - Halyqpen tikeleı jeli arqyly suhbattasý kezinde Elbasy óz tarıhyn bilmegen eldiń bolashaǵy bulyńǵyr ekenin aıtty.
Biz óz tarıhymyzdy tanyp bilý úshin eń aldymen qazaq dalasynan shyqqan tulǵalardy halyqqa tanytýymyz kerek. Olardyń kóbi jalpy kópshilike áli belgisiz bop qalýda, deıdi QazAqparat tilshisine suhbat bergen Qazaqtyń Abaı atyndaǵy ulttyq pedagogıkalyq ýnıversıtetiniń janyndaǵy Ahmet Baıtursynov atyndaǵy Alash arystarynyń ǵylymı-pedagogıkalyq murasyn zertteý ortalyǵynyń dırektory Dana Muqatova.
Qazaqstan Prezıdenti «Mádenı mura» baǵdarlamasyn júzege asyrýǵa memlekettik bıýdjetten birinshi kezeńde 2 mıllıard 700 myń, al ekinshi kezeńge 4 mıllıard teńge kóleminde qarjy bólingenin aıtty. Tarıh ǵylymynyń kandıdaty Dana Muqatqyzynyń aıtýynsha, Alash muralaryn jınaýda Ahmet Baıtursynov atyndaǵy Alash arystarynyń ǵylymı-pedagogıkalyq murasyn zertteý ortalyǵy aldynda áli sheshimin tappaǵan birqatar qıyndyqtar bar. Onyń birinshisi - zertteýshilerdiń azdyǵy, ekinshisi - muraǵatta jatqan qujattardyń barlyǵy birdeı olardyń qolyna túse bermeıdi, úshinshisi - olardy jınap, jalpy jurtshylyqqa kórsetýdiń júıesi jolǵa qoıylmaǵan.
«Alash muralary degende kóp adamdar 20 ǵasyrdyń bas kezindegi Alash qozǵalysynyń ókilderi dep túsinedi. Ol qazaq dalasyndaǵy barlyq áıgili tulǵalardy qamtıdy. Bizge qazaqtaný, talanttaný, tulǵataný baǵytynda áli kóp jumys isteý kerek. Olardyń kóbi ashylmaı jatyr. Bul ǵalymdardyń, zertteýshilerdiń aldynda turǵan basty másele», deıdi Alash arystarynyń ǵylymı-pedagogıkalyq murasyn zertteý ortalyǵynyń dırektory.
