Bizge qazaq tildi jobalardy kóbeıtý qajet - Lázzat Tanysbaı
ASTANA. QazAqparat - «Astana» arnasynyń bas dırektory Lázzat Tanysbaıdyń aıtýynsha, búginde teledıdar salasynda qazaq tildi jobalarǵa suranys joǵary. Alaıda arnalar tarapynan usynys az bolyp tur, dep habarlaıdy QazAqparat tilshisi.
«Búgin meniń áriptesterim óz jobalaryn tanystyrdy. Alaıda onyń ishinde memlekettik tilde jobalar az. Negizi, búginde qazaq tildi kórermenniń tarapynan ondaı jobalarǵa suranys joǵary. Biraq biz ony toltyra almaı otyrmyz. Aldaǵy ýaqytta osy máselege basa nazar aýdaryp, qazaq tildi jobalardy kóptep shyǵarý qajet», - dedi Tanysbaı búgin «Astana Media Week» aptalyǵy aıasynda teledıdar máselelerine arnalǵan sessııada. Osy oraıda arna basshysy serıaldar salasyndaǵy qazaq tildi jobalardy mysal retinde keltirdi.
Onyń aıtýynsha, osy ýaqytqa deıin «Astana» arnasy biraz serıaldardy túsirip shyqty. Sonyń ishinde «Jibek» serıaly reıtıngte birinshi orynnan túspeı keledi.
«Osynyń ózi memlekettik tilde túsirilgen jobalarǵa degen joǵary suranystyń dáleli bolsa kerek», - dep atap kórsetti Tanysbaı.
Aıta keteıik, búgin Astanadaǵy «Qazmedıa» ortalyǵynda «Astana Media Week» aptalyǵy bastaldy . Sharany QR Aqparat jáne kommýnıkatsııalar mınıstri Dáýren Abaev ashty . Úshkúndik shara aıasynda buqaralyq aqparat salasyndaǵy ózekti máseleler, sondaı-aq aqparattyq texnologııalardyń damý bolashaǵy keńinen talqylanady. Osyǵan oraı, jýrnalıster men kommýnıkatsııalar salasynyń mamandaryna arnalǵan master-klasstar ótedi. Aımaqtyq buqaralyq aqparat quraldarynyń forýmy da uıymdastyrylady. Al Astana Digital Forum-da tsıfrlyq marketıng, kommýnıkatsııalar salasyndaǵy tyń jobalar, messendjerler men chat-bottar, Telegram arqyly tabys tabý kózderi, Qazaqstandaǵy krıptovalıýtalar naryǵynyń damýy, elektrondy BAQ, áleýmettik jeliler men blogerler, ınternette bıznes ashý joldary jáne taǵy basqa ózekti máseleler talqyǵa salynady. Osy jıynǵa otandyq jáne sheteldik sarapshylar shaqyrylyp otyr
