Bizge esep emes, naqty is kerek! - Elbasy Nursultan Nazarbaev
sp;ASTANA. QazAqparat /Arman Asqarov/ - Meniń 15 jasar ulym bar. Sol balam mektepten kelgenshe, janymdy shúberekke túıip otyramyn. Óıtkeni Tarazdaǵy mektep oqýshylarynyń kóbi - jasóspirimderden qurylǵan qylmystyq toptardyń múshesi. Mektep, aýdan bolyp tóbelesip jatady. Aty-jónimdi aıtsam, balama kesiri tıe me dep qorqamyn.
Búgin Aqordada tikeleı jeli arqyly halyqpen tildesip jatqan QR Prezıdenti Nursultan Nazarbaevqa habarlasqan Taraz qalasynyń turǵyny osylaı dedi, dep habarlaıdy QazAqparat.
Osy másele boıynsha Elbasy Jambyl oblysynyń ákimi Bóribaı Jeksembınnen esep aldy. Onyń sózine qaraǵanda, júrgizilgen jumystardyń nátıjesinde sońǵy jyldary jasóspirimder arasyndaǵy qylmystar sany azaıyp keledi, buqaralyq aqparat quraldarynda taraǵan aqparattyń birazy shyndyqqa janaspaıdy. «Qazirgi kezde quqyq qorǵaý jáne prokýratýra organdary jasóspirimderdiń qylmystyq áreketterge qatyspaıtyndyǵyn anyqtap otyr», - dedi B.Jeksembın.
Al QR Іshki ister mınıstri Serik Baımaǵanbetovtyń aıtýynsha, bıyl oblys boıynsha kámelettik jasqa tolmaǵandardyń qatysýymen 140 qylmystyq oqıǵa oryn aldy. Onyń 90-y oblys ortalyǵy - Taraz qalasyna tıesili. Qazirgi kezde quqyq qorǵaý organdarynda aýyr qylmysqa bara alatyn 18 myńnan astam jasóspirim tirkeýde tur.
«Bizge esep emes, naqty is kerek!», - dedi Prezıdent ákim men mınıstrge qaratyp aıtqan sózinde. Osy másele boıynsha N.Nazarbaev oblys basshylyǵyna, QR Іshki ister mınıstrligi men QR Týrızm jáne sport mınıstrligine tıisti tapsyrma berip: «Búgingi tańda jastardyń demalys ýaqyttaryn durys paıdalanýyn qamtamasyz etý qajet. Olar ózderin sportta kórsetsin. Sondaı-aq osy másele boıynsha ata-analarmen tıisti jumys júrgizý qajet», - dedi Elbasy.
